Mirjalol Qosimov: “Al-Hilol”ni hurmat qilamiz, ammo ulardan qo‘rqmaymiz

Osiyo Chempionlar Ligasi guruh bosqichi 1-turi doirasida bo‘lib o‘tadigan “Al-Hilol” — OKMK bellashuvidan avval matbuot anjumani o‘tkazildi. Unda Olmaliq klubi bosh murabbiyi Mirjalol Qosimov va yarim himoyachi Yovan Jokich ishtirok etdi.

Avvalambor, assalomu alaykum! Barcha musulmon ahli va yurtdoshlarimizni kirib kelgan muborak Ramazon oyi bilan qutlayman. Hammaga sihat-salomatlik va omad tilayman. Ertaga OKMK jamoasi uchun yangi sahifa ochilmoqda. Jamoamiz ilk bor OChL guruh bosqichida ishtirok etadi. Maqsad guruhdan chiqish. Guruh bosqichi yakunida to‘plangan ochkolarga qarab, kim qaysi o‘rinni olishini bilib olamiz.

Jamoa saralash o‘yinidan keyin tiklanish jarayonini qanday o‘tkazgani haqida

Jamoamiz bu yerga kelishdan avval muhim va murakkab kechgan o‘yinda qatnashdi. Shuningdek, yo‘l va parvozlar ham o‘z ta’sirini o‘tkazdi. Qatarga bordik, u yerdan Toshkentga qaytib, so‘ngra Saudiya Arabistoniga keldik. Lekin bu biz uchun bahona bo‘lib qolishi kerak emas. Bu yerga yaxshi niyatlar bilan keldik. O‘ylaymanki, bu jihat u qadar katta ta’sir o‘tkazmaydi.

Ramazon oyining futbolchilarga qanday ta’sir ko‘rsatishi haqida

Bu ta’sir qilmaydi. Orada vaqt bor. O‘yinlar iftorlikdan keyin mahalliy vaqt bilan kechki 22:00 ga belgilangan. Bu vaqt ichida futbolchilar tiklanib oladi.

“Al-Hilol” bilan o‘yinda jamoasidan nima kutayotgani haqida

Har bir murabbiy jamoasidan yaxshi natija kutadi. Bu oson bo‘lmasligini bilib turibmiz. “Al-Hilol” — nomdor jamoa. Raqibni hurmat qilamiz, ammo ulardan qo‘rqmaymiz. OKMK ushbu musobaqaga yaxshi niyatlar bilan yetib keldi. O‘ylaymanki, jamoamiz chiroyli o‘ynab, g‘alabaga intiladi.

Mirjalol Qosimov, OKMK bosh murabbiyi

Ertaga juda ham qiyin o‘yin bo‘ladi. Biz muhim uchrashuvga astoydil tayyorgarlik ko‘ramiz. Umid qilamanki, ertangi bahs biz uchun omadli bo‘ladi.

Yovan Jokich, OKMK yarim himoyachisi