Bosh prokuratura huzuridagi departament va DXX Andijon viloyati boshqarmalari tomonidan o‘tkazilgan tezkor tadbir davomida Andijon shahar Xalq ta’limi bo‘limi boshlig‘i 900 dollar pora olayotganida ushlandi.
Ma’lum qilinishicha, Andijonda fuqaro boshqa bir fuqaroning yaqin tanishlarini xalq ta’limida attestatsiyadan o‘tkazish, 3 nafar tanishini maktab direktori va direktor o‘rinbosari lavozimlariga tayinlash masalasini hal qila olishini aytgan.
Fuqaro yuqori lavozimda ishlovchi tanishlari orqali mazkur masalalarni ijobiy hal qilib berishi evaziga 8400 dollarni olgan vaqtida ashyoviy dalillar bilan ushlangan.
E’lon qilingan videolavhada fuqaro o‘z aybiga iqror bo‘lganini ko‘rish mumkin. “Qilgan ishimdan pushaymonman”, — deydi u.
U mazkur pullarning bir qismini Andijon shahar Xalq ta’limi bo‘limi boshlig‘iga olib borishi lozimligini qo‘shimcha qilgan.
Shundan so‘ng, huquqni muhofaza qilish organlari xodimlari tezkor tadbirni davom ettirgan. Andijon shahar Xalq ta’limi bo‘limi boshlig‘i yuqoridagi masalalarni ijobiy hal qilish evaziga undan 900 dollarni olganida qo‘lga olingan.
XTB boshlig‘iga nisbatan Jinoyat kodeksining 210-moddasi (pora olish), fuqaroga nisbatan esa 168 (firibgarlik), 28 (jinoyat ishtirokchilarining turlari), 211-moddalari (pora berish) bilan jinoyat ishi qo‘zg‘atilgan.
Avvalroq Buxoroda tezroq kredit olish uchun bank boshqaruvchisiga 100 dollar pora bergan fuqaro jinoyat ustida qo‘lga olingani, Samarqandda fuqaroni “ayollar daftari”ga kiritish uchun 500 dollar talab qilgan mahalla raisiga jinoyat ishi qo‘zg‘atilgani to‘g‘risida xabar berilgandi.
Izoh (0)