Сурхондарё вилоятида фуқаронинг турмуш ўртоғи билан ажрашиш масаласини тезлаштириб бермоқчи бўлган шахс ушланди, деб хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Маълум бўлишича, фуқаро Ш.Ж. ўзини «М.» адвокатлик бюроси адвокати деб таништириб, шу йўл билан фуқаро Б.нинг ишончига кириб, унинг турмуш ўртоғи билан ажрашиш масаласини суд тизимида ишловчи танишлари билан гаплашиб тез кунда ҳал қилиб беришга ваъда берган. Эвазига 10 миллион сўм сўраган.
Департамент ҳамда ДХХнинг Сурхондарё вилояти бошқармалари томонидан ўтказилган тезкор тадбирда сохта адвокат пулларни фирибгарлик йўли билан олган вақтида ашёвий далиллар билан ушланган.
Ҳолат юзасидан Ш.Ж.га нисбатан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкентда иккита Captiva-4 олиб беришни ваъда қилиб, фуқарони 63 минг долларга чув туширган шахсга жиноят иши қўзғатилгани, Андижон шаҳар Халқ таълими бўлими бошлиғи 900 доллар пора олаётганида ушлангани, Фарғонада 1200 доллар эвазига фуқаронинг паспортидаги исми ва туғилган йилини ўзгартириб беришни ваъда қилган шахс қўлга олингани ҳақида хабар берилган эди.
Изоҳ (0)