Hema Malini, Shridevi, Dharmendra: Hind kinosi afsonalarining taqdiri qanday kechgan?

Bollivud kinosining eng yorqin aktyor va aktrisalari hayoti bilan bog‘liq qiziqarli ma’lumotlarni e’tiboringizga havola etamiz.

Amitabh Bachchan

Nafaqat aktyor, balki siyosatchi, prodyuser va teleboshlovchi hisoblangan aktyor 11 marotaba Filmfare mukofoti, shuningdek, Hindistonning boshqa bir qancha nufuzli mukofotlarini ham qo‘lga kiritgan. “Qasos va qonun” filmidagi ijrosidan keyin yaxshi tanilgan aktyor, boshqa loyihalarda ishtirok etib muvaffaqiyatga erishgan. Bugungi kunda ham rol ijro qilishdan charchamaydigan Amitabhning o‘g‘li, qizidan farqli o‘laroq aktyorlikni tanlagan.

Mithun Chakraborti

1982-yilda “Disko raqqosi” filmi ekran yuzini ko‘rganidan keyin mashhurlikka erishgan aktyor, karyerasi davomida 350 dan ortiq filmda suratga tushgan. Yogita Bali bilan turmush qurib, to‘rt nafar farzandli bo‘lgan Chakraborti bugungi kunda ham filmlarda rol ijro qilib turadi.

Rekha

Kino sabab maktabni tashlagan aktrisa, suratga olish jarayonida Amitabh Bachchan bilan tanishgan. Jaya bilan turmush qurgan aktyorning Rekhaga ilakishib qolgani mish-mish va turli muhokamalarga sabab bo‘lgan. 1982-yilda suratga olish maydonchasida jiddiy jarohat olgan Bachchan, bir necha hafta komada yotgan. O‘ziga kelganidan keyin esa Rekha bilan munosabatlariga nuqta qo‘yib, oilasining bag‘riga qaytgan. Mukesh Aggarvalga turmushga chiqqan akrtisa, ayni vaqtda singlisi va jiyanlari bilan Mumbayda yashaydi va onda-sonda ekranlarda ko‘rinish beradi.

Rakhi Gulzar

“Izdan chiqqan hayot” filmi debyut bo‘lgan aktrisa yiliga o‘ntaga yaqin filmda suratga tushgan. Salomatligida muammo kuzatilganidan keyin kinoni tark etib o‘zini oilasiga bag‘ishlagan. Keyinchalik turmush o‘rtog‘i bilan ajrashgan va qizining otasi bilan qolgani spirtli ichimlikka ruju qo‘yishiga sabab bo‘lgan. Bu uning tashqi ko‘rinishiga ham salbiy ta’sir qilganiga qaramay, o‘zida kuch topib kinoga qaytishga qaror qilgan. Uning ishtirokidagi so‘nggi film 2003-yilda ekran yuzini ko‘rgan.

Shridevi

70-yillarda debyut rolini ijro qolgan aktrisa karyerasi davomida 265 ta filmda suratga tushgan. Ijrosi sabab Filmfare mukofotini Eng yaxshi aktrisa sifatida qabul qilgan Shridevi, olasiga o‘zini bag‘ishlash maqsadida 1997-yil kinosanoatni tark etgan. 1999-yilda fikridan qaytib qolgan aktrisa, 17 yil ichida 4 ta kartinada rol o‘ynagan.

Dharmendra

19 yoshida ota-onasi tomonidan majburan uylantirib qo‘yilgan aktyor, ikki farzandli bo‘lganidan keyin ajrashib, hayotini butkul o‘zgartirishga qaror qilgan. U “Zita va Gita” filmining suratga olish jarayonida Hema Malini bilan tanishgan. Hema va Dharmendra Bollivudning eng ko‘p muhokamalarga sabab bo‘lgan juftligi bo‘lgan. Turmush qurgan yulduzlar oilasida, ikki nafar farzand dunyoga kelgan.

Hema Malini

Nafaqat rol ijro qilish, balki raqsga tushishni ham qoyillatadigan aktrisaning mashhurlikka erishishiga “Zita va Gita” filmi sabab bo‘lgan. Hindiston bo‘ylab tanilgan aktrisaning oilali Dharmendra bilan uchrashishi yaqinlarining g‘azabini keltirgan. 1978-yilda otasi vafot etganidan keyin aktrisa, Dharmendraning turmush qurish taklifini qabul qilgan. Uzoq yillar birga yashagan juftlik siyosat bilan ham shug‘ullangan. Dharmendra 2000-yilning boshida Hindiston parlamenti quyi palatasining milliy partiyasini boshqargan.