Amitabh Bachchanning muvaffaqiyatga erishishiga hissa qo‘shish bilan birga, uning xiyonatiga ko‘z yumgan aktrisa — Jaya Bachchan haqida qiziqarli faktlar

Zamonasining eng yaxshi aktrisasi hisoblangan Jaya Bachchan 2021-yilning 9-aprelida 73 yoshni qarshiladi. Bollivud aktrisasining hayoti bilan bog‘liq faktlarni e’tiboringizga havola etamiz.

Qizlik familiyasi Bhaduri bo‘lgan Jaya, yozuvchi va shoir Tarun Kumar Bhadurining qizi. U a’lo bahoga o‘qigan hamda Kino va televideniye institutini oltin medalga bitirgan.

Aktrisalikdan boshqa kasbni tasavvur qila olmagan Jaya, 14 yoshida rejissor Satyajit Ray tomonidan “Katta shahar” filmida suratga tushish uchun tanlab olingan. Film 1963-yilda ekran yuzini ko‘rgan.

Jaya 70-yillarda yulduzga aylanib bo‘lganida Amitabh Bachchan endigina kino olamiga qadam qo‘ygan. Ularning har ikkisi rejissor Rishikesh Mukerjining “Guddi” filmining tasvirga olish maydonchasida tanishgan.

Amitabh Jayaning sevgilisini gavdalantirishi kerak bo‘lgan, ammo rol Samit Bhanjga nasib qilgan. “Bansi va Birju” (1972) ular ishtirogidagi ilk film bo‘lgan. Keyinchalik “Takabbur”, “Mili”, “Qasos va qonun” filmlarida ishtirok etgan.

Amitabhning karyerasida rafiqasining roli beqiyos, u hali tanilib ulgurmaganida Jaya u bilan birga bosh qahramon rolini o‘ynashga rozi bo‘lgan. 1988-yil ekran yuzini ko‘rgan va Amitabhning muvaffaqiyatga erishishiga sababchi bo‘lgan “Shahanshox” filmining ssenariysini Jaya yozgan.

Amitabh zamonaviy va shu bilan birga urf-odatlarga amal qiladigan qizga uylanishni xohlagan. Jurnal muqovasida Jayaning suratini ko‘rib u mazkur obrazga mos kelishini tushunib yetgan. U intervyulardan birida “Guddi”ning suratga olish maydonchasida tanishguncha, jurnalda Jayaning suratini ko‘rib yoqtirib qolgani, ko‘zlari uni o‘ziga rom qilganini aytgan. Jaya Amitabh bilan o‘rtasidagi munosabatlarni bir ko‘rishdagi sevgi deb atab bo‘lmasligi, haqiqiy tuyg‘ular keyinroq paydo bo‘lganini ta’kidlagan.

Juftlikning to‘yidan uch yil o‘tib, Amitabh Rekhaga ilakishib qolgan. Ularning munosabatlari haqida gap-so‘zlar bolalagan bir vaqtda Rekha, Rishi Kapur va Nitu Singxning to‘yiga mangalsutrda, sindur surtib tashrif buyurgan.Amitabh bilan gaplashishga chiqqan vaqti kameralarning bari ularga qaratilgan. Shunda hamma Jaya boshini ilk bor eggan holda yosh to‘kkaniga guvoh bo‘lgan. Ammo bu bilan u taslim bo‘lishni istamagan. Rekhani uyidagi kechki ovqatga taklif qilib, turmush o‘rtog‘ini unga berib qo‘ymoqchi emasligini tushuntirib qo‘ygan.

Shundan keyin Jaya eriga butkul ishonishi va bunday mish-mishlar kinosanoat uchun yangilik emasligini aytib intervyu bergan. Juftlik o‘rtasidagi munosabatlar esa kundan-kunga yaxshilangan va bugungi kungacha ham ular oilasi bilan bog‘liq mish-mish tarqalishiga qarab turmaydi.

Hayoti davomida 9 marta Filmfare mukofotini qo‘lga kiritgan aktrisa, yana ko‘plab mukofotlarga nomzod bo‘lgan. Aktyor Denni Denzongpa va prodyuser Romesh Sharmadan tashqari aktrisaning yana bir nechta yaqin do‘sti bor.