Ўзбекистон Транспорт вазирлиги Россияга амалга оширилаётган авиақатновлар бўйича аҳолидан келиб тушаётган кўплаб мурожаатларга изоҳ берди.
Маълум қилинишича, Россияга Ўзбекистондан борувчи йўловчилар оқимининг ҳаддан ташқари кўплиги, бугунги эпидемиологик вазият туфайли транспортнинг бошқа турларида қатновларнинг амалга оширилишига рухсат этилмагани, авиақатновлар сонининг ҳам чеклангани талаб ва таклиф ўртасидаги номутаносибликнинг кескин ортиб кетишига сабаб бўлмоқда.
Пандемиягача бўлган даврда Ўзбекистоннинг турли ҳудудларидан Россияга Uzbekistan Airways авикомпанияси ҳафтасига 87 та рейс бажарган бўлса, Россия авиакомпаниялари мамлакатнинг турли шаҳарларига ҳафтасига 97 рейс амалга оширган. Фақатгина авиақатновлар орқали ҳафтасига 40 мингдан ортиқ йўловчиларга хизмат кўрсатилган.
Бундан ташқари, Тошкент–Москва, Андижон–Москва, Тошкент–Қозон, Тошкент–Волгоград, Тошкент–Саратов, Тошкент–Новосибирск, Тошкент–Уфа, Андижон–Уфа йўналишларида мунтазам равишда ҳафтасига 13 та поезд қатновлари амалга оширилган. Шу билан бирга, Тошкент–Москва, Тошкент–Санкт-Петербург, Тошкент–Қозон, Тошкент–Нижний Новгород, Тошкент–Омск, Тошкент–Новосибирск йўналишларида ҳафтасига 12 маротабадан автобус қатновлари амалга ошириб келинган.
«Айнан юқорида келтириб ўтилган кўрсаткичларнинг ўзи ҳафтасига бор йўғи бир маротаба амалга оширилаётган мунтазам авиқатновларга чипталарнинг нима учун айни дамда сотувда қолмаганлигига изоҳ бўла олиши мумкин. Турли транспорт қатновларидан фойдаланган йўловчиларнинг барчаси ҳозирда ўрнатилган чеклов чоралари сабаб фақатгина авиқатновлар орқалигина сафарни амалга оширишга мажбур бўлмоқда.
Авиачипта нархларини сунъий равишда ошириб сотиш мақсадида Uzbekistan Airways компанияси агентлари томонидан чипталарни олдиндан сотиб олинганлиги тўғрисида ижтимоий тармоқларда тарқатилаётган даъволар эса мутлақо асоссиздир», — дейилади муносабатда.
Uzbekistan Airways авиакомпанияси раҳбарияти энг қуйи поғонадаги ходимлардан тортиб, юқори лавозимлардаги раҳбарларнинг ҳам авиачипта сотувлари билан боғлиқ турли-туман кўринишдаги нохолис хатти-ҳаракатларни содир этишларига нисбатан тоқатсиз муносабатда эканини, чипта сотувлари билан боғлиқ барча жараёнлар шаффоф тарзда амалга оширилиши устидан назорат ўрнатилганини маълум қилган.
Таъкидланишича, Uzbekistan Airways авиакомпанияси томонидан айни дамда Тошкент–Москва йўналишида бажарилаётган мунтазам авиақатовлар учун эконом класс чипта нархи бир томонга 4,2 миллион сўмгача, бизнес-класс чипта нархлари эса 10, 736 миллион сўмгача сотилмоқда.
«Шу ўринда йўловчилардан тушунмовчиликларнинг олдини олиш учун чипталарни тезлаштириб харид қилиш хизматларини таклиф қилувчи шубҳали шахсларга мурожаат этмаслигини сўраб қоламиз. Чиптада кўрсатилган ва ўзингиз тўлаган нархни таққослашингизни тавсия этамиз», — дейилади вазирлик изоҳида.
Ўзбекистон Транспорт вазирлиги фуқаролардан бу каби ёлғон хабарларга ишониб, алданиб қолишларининг олдини олиш мақсадида чартер рейсларини амалга оширувчи авикомпанияларнинг парвозни бажаришига рухсат этилгани тўғрисидаги маълумотларни Фуқаро авиацияси агентлиги расмий веб-сайтидан аниқлаштириб олишларини тавсия этади.
Аввалроқ Россия 1 апрелдан Ўзбекистон билан мунтазам авиақатновларни тиклаши тўғрисида хабар берилганди. Россиянинг Ўзбекистондаги элчихонаси консуллик бўлими биринчи босқичда фақат битта — ҳафтасига бир марта Москва—Тошкент йўналиши амалга оширилишини маълум қилганди. Ушбу хабардан сўнг Россияга учувчи самолёт чипталарига талаб 165 фоизга ўсганди.
Изоҳ (0)