Abdug‘ofur Ahmedov boshqa ishga o‘tishi munosabati bilan Vazirlar Mahkamasi huzuridagi Din ishlari bo‘yicha qo‘mita raisi lavozimidan ozod etildi. Bu haqda qo‘mita matbuot xizmati xabar berdi.
U ushbu lavozimda 2019-yil sentabr oyidan buyon ishlab kelgan. Bungacha Abdug‘ofur Ahmedov Davlat xavfsizlik xizmati Surxondaryo viloyati boshqarmasi boshlig‘i lavozimida faoliyat yuritgan. Uning yangi ish joyi haqida hozircha ma’lum qilinmagan.
Din ishlari bo‘yicha qo‘mitaning yangi raisi etib 2018-yilning 18-oktabridan buyon Andijon viloyati hokimining jamoat va diniy tashkilotlar bilan aloqalar bo‘yicha o‘rinbosari lavozimida ishlab kelgan Sodiq Toshboyev tayinlandi.
Sodiq Toshboyev 1978-yilda Samarqand viloyatida tug‘ilgan. 1999-yilda G.Plexanov nomidagi Rossiya iqtisodiyot akademiyasi Toshkent filialini tamomlagan, ma’lumoti bo‘yicha mutaxassisligi — iqtisodchi, siyosatshunos va tizimli tahlilchi. U 2001—2002-yillarda “O‘zagrosug‘urta” Samarqand filiali yetakchi mutaxassisi, 2004—2018-yillarda harbiy qism harbiy xizmatchisi bo‘lgan.
Izoh (0)