Ommaviy emlashning keng miqyosli dasturlariga qaramay, pandemiya 2021-yilda tugashi haqida hozircha aniq ishonch yo‘q. Bu haqda O‘zbekiston bosh vaziri o‘rinbosari, investitsiyalar va tashqi savdo vaziri Sardor Umurzoqov Toshkentda 5-aprel kuni bo‘lib o‘tgan INNOPROM sanoat ko‘rgazmasi ochilishida aytib o‘tdi.
“Barcha mamlakatlar uchun pandemiya jiddiy muammoga aylandi. U jahon iqtisodiyotiga, xalqaro ishlab chiqarish zanjirlariga zarba berdi va bizning rivojlanishimizga bosim o‘tkazishda davom etmoqda. Asosiy energiya manbalari va xomashyo tovarlariga jahon narxlari konyukturasi yomonlashuvi va o‘zgaruvchanligi, aviatsiya bozori va turizm sohasida inqirozni keltirib chiqargan cheklov choralari joriy etilishi va boshqa bir qator omillar jahon yalpi mahsuloti, jahon savdosi hajmi va to‘g‘ridan to‘g‘ri investitsiyalar jahon oqimining keskin pasayishiga olib keldi”, — deya uning ko‘rgazma ochilishida so‘zlagan nutqini keltirmoqda “Podrobno.uz”.
Sardor Umurzoqovning so‘zlariga ko‘ra, pandemiya boshlanganidan so‘ng davlat resurslarining misli ko‘rilmagan darajada safarbar etilishi, shu jumladan budjet va monetar rag‘batlantirish choralari jahon iqtisodiyotini deyarli koma holatiga tushirdi. Bundan tashqari, pandemiyadan oldin to‘plangan ko‘plab muammolarni hal qilish pandemiyadan keyingi davrga qoldirildi.
“Keng miqyosli emlash dasturlariga qaramay, bu yil pandemiya tugashi to‘g‘risida aniq ishonch yo‘q. Oqibatda investitsiya rejalari qoldirilmoqda va qo‘shimcha yordam paketlarining budjetga sezilarli yuki saqlanib qolmoqda”, — deb ta’kidlagan u.
Vazirning qo‘shimcha qilishicha, bunday sharoitda mamlakat uchun iqtisodiyotni raqamlashtirish, yuqori texnologiyalar va innovatsiyalarni jadal joriy etish, sanoat aloqalarini mustahkamlash, ushbu jarayonlarga xususiy sektorni faol jalb qilgan holda xalqaro aloqalarni rivojlantirish har qachongidan ham dolzarbdir.
“Pandemiya to‘rtinchi sanoat inqilobini, aqlli texnologiyalarni, internet buyumlar va sun’iy intellektni rivojlanishini tezlashtirishi mumkin bo‘lgan iqtisodiyotga ehtiyoj tug‘dirdi. Mehnat faoliyati, madaniy hordiq, savdo sohalari, davlat boshqaruvi va ta’limning onlayn muhitga o‘tishi zamonaviy taraqqiyotning tabiiy tendensiyasiga aylanib bormoqda. Pandemiyadan keyingi davrda ushbu muammolarga yaqqol javob sifatida iqtisodiyotning raqobatbardoshligini oshirish uchun texnologik o‘zgarishlarni rag‘batlantirish bo‘lishi kerak”, — degan u.
Izoh (0)