Оммавий эмлашнинг кенг миқёсли дастурларига қарамай, пандемия 2021 йилда тугаши ҳақида ҳозирча аниқ ишонч йўқ. Бу ҳақда Ўзбекистон бош вазири ўринбосари, инвестициялар ва ташқи савдо вазири Сардор Умурзоқов Тошкентда 5 апрель куни бўлиб ўтган ИННОПРОМ саноат кўргазмаси очилишида айтиб ўтди.
«Барча мамлакатлар учун пандемия жиддий муаммога айланди. У жаҳон иқтисодиётига, халқаро ишлаб чиқариш занжирларига зарба берди ва бизнинг ривожланишимизга босим ўтказишда давом этмоқда. Асосий энергия манбалари ва хом ашё товарларига жаҳон нархлари конюктураси ёмонлашуви ва ўзгарувчанлиги, авиация бозори ва туризм соҳасида инқирозни келтириб чиқарган чеклов чоралари жорий этилиши ва бошқа бир қатор омиллар жаҳон ялпи маҳсулоти, жаҳон савдоси ҳажми ва тўғридан-тўғри инвестициялар жаҳон оқимининг кескин пасайишига олиб келди», — дея унинг кўргазма очилишида сўзлаган нутқини келтирмоқда «Podrobno.uz».
Сардор Умурзоқовнинг сўзларига кўра, пандемия бошланганидан сўнг давлат ресурсларининг мисли кўрилмаган даражада сафарбар этилиши, шу жумладан бюджет ва монетар рағбатлантириш чоралари жаҳон иқтисодиётини деярли кома ҳолатига туширди. Бундан ташқари, пандемиядан олдин тўпланган кўплаб муаммоларни ҳал қилиш пандемиядан кейинги даврга қолдирилди.
«Кенг миқёсли эмлаш дастурларига қарамай, бу йил пандемия тугаши тўғрисида аниқ ишонч йўқ. Оқибатда инвестиция режалари қолдирилмоқда ва қўшимча ёрдам пакетларининг бюджетга сезиларли юки сақланиб қолмоқда», — деб таъкидлаган у.
Вазирнинг қўшимча қилишича, бундай шароитда мамлакат учун иқтисодиётни рақамлаштириш, юқори технологиялар ва инновацияларни жадал жорий этиш, саноат алоқаларини мустаҳкамлаш, ушбу жараёнларга хусусий секторни фаол жалб қилган ҳолда халқаро алоқаларни ривожлантириш ҳар қачонгидан ҳам долзарбдир.
«Пандемия тўртинчи саноат инқилобини, ақлли технологияларни, интернет буюмлар ва сунъий интеллектни ривожланишини тезлаштириши мумкин бўлган иқтисодиётга эҳтиёж туғдирди. Меҳнат фаолияти, маданий ҳордиқ, савдо соҳалари, давлат бошқаруви ва таълимнинг онлайн муҳитга ўтиши замонавий тараққиётнинг табиий тенденциясига айланиб бормоқда. Пандемиядан кейинги даврда ушбу муаммоларга яққол жавоб сифатида иқтисодиётнинг рақобатбардошлигини ошириш учун технологик ўзгаришларни рағбатлантириш бўлиши керак», — деган у.
Изоҳ (0)