Mirjalol Qosimov: “Al-G‘arafa” — kuchli raqib, biroq biz bu jamoadan qo‘rqmaymiz

OKMK futbol klubi bosh murabbiyi Mirjalol Qosimov Osiyo Chempionlar Ligasi pley-off bosqichi doirasida “Al-G‘arafa”ga qarshi kechadigan bahs oldidan o‘z fikrlari bilan o‘rtoqlashdi. Bu haqda OKMK matbuot xizmati xabar qilmoqda.

OKMK jamoasining maqsadi xalqaro musobaqalarda ishtirok etish. Klub infratuzilmasi ham oxirgi yillarda aynan shu maqsadga erishish uchun yo‘naltirilgan. Qolaversa, O‘zbekistonda futbolni juda ham qattiq yaxshi ko‘rishadi va mamlakatimizda futbol ishqibozlari juda ham ko‘p. OKMK Olmaliq shahridagi jamoamizning ashaddiy muxlislari uchun ham borini berib harakat qiladi. Shuningdek, xalqaro maydondagi ishtirok payti O‘zbekistondagi barcha ishqibozlar ham bizga befarq bo‘lmaydi, deb o‘ylayman.

Qatarga yaxshi niyatlar bilan kelganmiz. “Al-G‘arafa” — yaxshi jamoa. Raqibni o‘rganib chiqdik. Garchi “Al-G‘arafa” ichki chempionatida yaxshi ishtirok etolmayotgan bo‘lsa-da, jiddiy raqib. Kuchli mutaxassis qo‘l ostida yuqori malakali futbolchilar yig‘ilgan. Qolaversa, legionerlari, xususan, Ku Ja Chol, Gedeyra, Hanni va Moreno kabi individual kuchli ijrochilar mavjud.

Raqibning o‘yinlari videotasvirini ko‘rib chiqdik. Biz avvalambor o‘z o‘yinimizdan kelib chiqib harakatlanamiz. Bu guruh bosqichi emas, balki, bir o‘yindan iborat bahs. Qiyin tarafi shu. Bu nafaqat biz uchun, balki, “Al-G‘arafa” uchun ham kichik muammo. Bu futbol. Nima bo‘lishini o‘yinda ko‘ramiz.

Eng muhimi o‘yinga jiddiy tayyorgarlik ko‘ryapmiz. Futbolchilarimiz o‘yinning qiymati naqadar yuqori ekanligini yaxshi his etib turibdi. Biz nafaqat jamoamiz sha’ni, balki, o‘zbek klublarining xalqaro maydondagi avvalgi mavqeyini qaytarish uchun ham kurashamiz. Chunki oxirgi yillarda OFKda reytingimiz tushib ketgan. Avvallari uchta o‘zbek klubi guruh bosqichidan ishtirok etardi. Hozir esa bu ko‘rsatkich “1+1”ga aylangan.

Hali ta’kidlaganimdek, bu bahs bir uchrashuvdan iborat. Shu boisdan ham bo‘lajak bellashuvda imkon qadar kamroq xato qilib, yuzaga keladigan vaziyatlardan maksimal foydalanishimiz zarur.

“Al-G‘arafa”ni kuchli va kuchsiz jihatlari haqida

Birinchidan, hamma narsani o‘yin ko‘rsatadi. Hozirdan raqib haqida batafsil ta’rif berishni istamasdim.

Qo‘shimchasiga, menda raqibning kamchiliklarini sanash va yomonlash odati yo‘q. Doim asosiy urg‘uni o‘z jamoamga qarataman va raqibga omma oldida keskin bahoni bermayman. Shunisi aniqki, biz raqibdan qo‘rqmaymiz. Lekin “Al-G‘arafa” hurmatga sazovor jamoa. To‘p bilan ham yaxshi muomalada bo‘ladigan jamoa sifatida bilaman.

Menimcha, muxlislarni juda ham qiziqarli o‘yin kutmoqda. “Al-G‘arafa”da ham, bizda ham to‘p bilan ko‘proq muomalada bo‘lish talabi bor. Shunday o‘yin tarafdorimiz. Maydonda raqibga hech bir chiziqda bo‘shliq qoldirmaslik talab etiladi. Raqibni xato qilishga majburlab, o‘zimiz kamroq xato qilishimiz zarur bo‘ladi.

Mirjalol Qosimov, OKMK bosh murabbiyi