Rafael Varanda koronavirus aniqlandi. “Real” “Liverpul” va “Barselona”ga qarshi o‘yinlar oldidan asosiy himoyachilarisiz qoldi

“Real” himoyachisi Rafael Varan Chempionlar Ligasi chorak final dastlabki bahsi doirasidagi “Liverpul”ga qarshi o‘yinni o‘tkazib yuboradi.

Madridliklar klubi matbuot xizmatining ma’lum qilishicha, 6-aprel tongidagi tekshiruvlardan keyin fransiyalik futbolchida koronavirus aniqlangan.

Shu tariqa Varan “Liverpul”ga qarshi o‘yinni o‘tkazib yuboradi. Shuningdek, ushbu bahsda jarohat sabab “Real”ning yana bir markaziy himoyachisi Serxio Ramos ham ishtirok etolmaydi.

“Real” qaydnomasidan markaziy himoyachilardan Nacho va Eder Militao joy olgan.

“Real” — “Liverpul” uchrashuvi Toshkent vaqti bilan 6-apreldan 7-aprelga o‘tar kechasi 00:00 da boshlanadi.

Katta ehtimol bilan Ramos va Varan La Liga doirasida 10-aprel kuni bo‘lib o‘tadigan “Barselona”ga qarshi uchrashuvni ham o‘tkazib yuboradi.