“Hakam mehmonlarga nisbatan adolatsizlik qildi, bu yerda qizil kartochka yo‘q edi”. “Barselona” — “Valyadolid” o‘yinida bahsli holat kuzatildi

“Barselona” La Liga 29-turi doirasida 5-aprel kuni bo‘lib o‘tgan “Valyadolid”ga qarshi o‘yinda 1:0 hisobida g‘alaba qozondi.

Uchrashuvning 79-daqiqasida “Valyadolid” o‘yinchisi Oskar Plano katalonlar hujumchisi Usmon Dembelega nisbatan ishlatgan qo‘polligi uchun to‘g‘ridan to‘g‘ri qizil kartochkaga loyiq ko‘rildi.

Ispaniyalik sobiq hakamlar uchrashuv hakami Xayme Latrening bu qarori yuzasidan o‘z munosabatini bildirib o‘tdi. Ularning fikriga ko‘ra, Latre bu vaziyatda xatoga yo‘l qo‘ygan.

“Agar hakam qizil kartochka bilan bog‘liq vaziyatda xatoga yo‘l qo‘ysa, VAR bunga aralasha oladi. Ular vaziyatni ko‘rib chiqishi va hakamni chaqirishi kerak edi. Nima bo‘lishidan qat’i nazar bu qizil kartochka emas”, — deydi Iturralde Gonsales.

“Hakam bu vaziyatda “Valyadolid”ga nisbatan o‘ta adolatsiz bo‘ldi. Dembelega nisbatan ishlatilgan fol — qizil kartochkali emas. “Barselona” hujum qilayotgandi, u yiqitildi, biroq bu yerda jiddiy qo‘pollik yo‘q edi”, — deydi Anduxar Oliver.

Mazkur qizil kartochkadan keyin “Barselona” so‘nggi daqiqalarda bosimni oshirdi va 90-daqiqada gol urib, g‘alabani ilib ketdi. Golga Dembele mualliflik qildi.