Portugaliyada COVID-19 tarqalishi sababli joriy qilingan ikki oylik cheklovlardan so‘ng muzeylar, maktablar va kafelarning tashqari qismi 5-apreldan qayta ochildi. Bu haqda “Interfaks” xabar berdi.
Mamlakatda infeksiyaning tez sur’atlarda o‘sishi Rojdestvo va Yangi yil bayramlaridan so‘ng boshlandi. Mazkur bayramlar arafasida cheklovlar kamaytirilib, aholiga bayramlarni nishonlash imkoni berilgan edi. Yanvar oyining o‘rtalariga kelib hukumat qat’iy cheklovlarni qayta joriy qildi.
Ta’kidlanishicha, endilikda cheklovlarning yumshatilishiga qaramay, fuqarolar baribir ba’zi xavfsizlik choralariga rioya qilishi kerak.
Xususan, kafe ayvonidagi stolda maksimal to‘rt kishi birgalikda o‘tirishi mumkin. Muzeylar ishlaydi, ammo lozim topgan taqdirda, ular o‘z ish vaqtini qisqartirishi mumkin. Jamoat joylarida niqob taqish majburiy bo‘lib qolmoqda, odamlar asosan masofadan ishlashda davom etadi.
Hozirgi kunda mamlakatda 26,1 mingdan ortiq odam koronavirus bilan kasallangan. Pandemiya boshlanganidan beri mamlakatda infeksiya yuqtirib olish bo‘yicha 823,3 mingdan ortiq holat qayd etildi, 16,9 ming kishi kasallikdan vafot etdi.
Avvalroq Germaniya harbiylari Portugaliyaga COVID-19’ga qarshi kurashda yordam berishi haqida xabar berilgandi. Koronavirusga chalinish holatlarining keskin ortishi fonida kasalxonalarning reanimatsiya bo‘limlarida bo‘sh joylar tugab borayotgani sababli Germaniya Qurolli Kuchlari mamlakatga tibbiyot xodimlari va zarur jihozlarni yuborishini ma’lum qilgan edi.
Shuningdek, Portugaliya COVID-19 pandemiyasiga qarshi kurashish uchun Yevropa Ittifoqidan yordam olmoqchiligi haqida xabar berilgan.
Izoh (0)