2020 йилда Давлат хавфсизлик хизмати идоралари саъй-ҳаракати билан 4 та террорчилик актининг олди олинди. Улардан 2 таси Ўзбекистонда, 2 таси МДҲ мамлакатларида содир этилиши режалаштирилган эди. Бу ҳақда ДХХ матбуот хизматига таяниб, ЎзА хабар берди.
Шунингдек, маълум қилинишича, экстремистик ва террористик ташкилотларнинг 67 та яширин гуруҳлари фаолиятига чек қўйилган.
Экстремизм ва терроризмга алоқадорликда айбланиб, хорижда яшириниб юрган 98 нафар Ўзбекистон фуқароси мамлакатга олиб келинди ҳамда жавобгарликка тортилган.
Бундан ташқари, 747 килограммдан ортиқ гиёҳванд моддалар, 251 минг дона психотроп таблеткалар, 594 дона қурол, 4781 дона ўқ-дори ва 24,4 килограмм портловчи моддалар ноқонуний муомаладан олинган, 540 дан ортиқ коррупция билан боғлиқ ҳолатларга чек қўйилган.
Бюджет ва кредит маблағларининг талон-тарож қилиниши ҳамда мақсадсиз ишлатилиши билан боғлиқ ҳолатлар аниқланиб, 557 миллиард сўм давлат фойдасига ундирилган.
Таъкидланишича, ноқонуний миграция ва одам савдосига алоқадор 102 та жиноий гуруҳ фош этилган, чегарадан ноқонуний олиб ўтилган 58,3 миллиард сўмлик товар-моддий бойликлар қўлга олинган.
Шу билан бирган, Ўзбекистон Президентининг топшириғига кўра амалга оширилган «Меҳр 3» ва «Меҳр 4» гуманитар операциялари доирасида Сурия Арабистони ва Афғонистон давлатларида оғир шароитда қолган 122 нафар аёллар ва болалар мамлакатга олиб келинган.
Эслатиб ўтамиз, 2019 йилнинг сентябрида Олий Мажлис Сенатининг ўн олтинчи ялпи мажлисида «Ўзбекистон Республикаси Давлат хавфсизлик хизмати кунини белгилаш тўғрисида»ги қонун кўриб чиқилган ва унга кўра, 5 апрель Давлат хавфсизлик хизмати куни этиб белгиланган эди.
Мавзуга доир:
Изоҳ (0)