Qashqadaryo hokimi Zoir Mirzayev viloyatda koronavirus bilan og‘rigan bemorlarni davolovchi, Germaniyadan olib kelingan kislorod stansiyalari mas’ullar e’tiborsizligi sabab hamon ishlatilmayotganini, hatto shifoxonalarga ham o‘rnatilmaganini ma’lum qildi. Bu haqda Zoir Mirzayev boshchiligidagi rahbarlarning Kasbi xalqi bilan bo‘lgan muloqotida aytib o‘tildi, deya xabar berdi “Daryo” muxbiri.
Ta’kidlanishicha, 2021-yil 2-aprel kuni viloyat rahbari Zoir Mirzayev boshchiligidagi mas’ullar Kasbi tumanining Fazli qishlog‘ida bo‘lib, aholiga 2021-yilda tumanda amalga oshirilishi lozim bo‘lgan ishlar haqida hisob bergan.
“Viloyatimizga hurmatli prezidentimizga aytib, qiymati salkam 2 milliard so‘m bo‘lgan uchta kislorod stansiyasini olib kelgandik. Ammo ming afsuski, viloyat sog‘liqni saqlash boshqarmasi boshlig‘i o‘rinbosarining mas’uliyatsizligi sabab kislorod stansiyalari haligacha o‘rnatilmagan. Ishlatilishi haqida-ku, gapirmasak ham bo‘ladi. Men buning sababini so‘radim. ‘Bo‘ldi, muammo yo‘q. Besh-olti kunda o‘rnatib, ishlatamiz’, deyapti. Xo’sh, qanday qilib, bu odam bilan gaplashib bo‘ladi? Har kuni odamlar havo deb, kislorod deb yotsa-yu, bu odam besh-olti kunda o‘rnatamiz deb, tayyor kisloroddan foydalanmasa? O‘rnatilsa, ikki soatda ishlay boshlaydi-ku. Havodan kislorodni olib beradigan Germaniyaning uskunasi. Eng zamonaviy, bitta kasalxonani bittasi to‘liq ta’minlaydi. Kislorod ballon ham tashib yurishga hojat qolmaydi. Undan tezroq foydalanishimiz kerak. Yuqumli kasalliklar shifoxonasida olti nafar bemor koronavirusga qarshi davolanyapti. Ular ko‘paymaydi deb kafolat berib bo‘lmaydi-ku”, — dedi viloyat hokimi.
Zoir Mirzayev shuningdek, viloyatda to‘y va tadbirlar hamon ko‘pchilik bilan o‘tayotganini, karantin qoidalariga har doim ham amal qilinmayotganini eslatib, “Mahallaga farqi yo‘q, doktorga farqi yo‘q, SESga farqi yo‘q, kim targ‘ibot qiladi?”, — dedi.
“Vaksinatsiya jarayoni boshlandi, kecha ham (2021-yil 1-aprel nazarda tutilmoqda) 400 nafarga yaqin odam vaksina oldi. Odamlarga buni tushuntirib berib, kim vaksinatsiya jarayonlarini tugatadi. Davlat bepul vaksina bergach, nega uni targ‘ibot qilib, aholiga yetkazib berib, emlash jarayonini tashkil qilolmaymiz? Vaholanki, birinchilardan bo‘lib emlanishi lozim bo‘lganlar ro‘yxatida tibbiyot xodimlarining o‘zi turibdi”, — dedi Zoir Mirzayev.
Viloyat rahbarining qo‘shimcha qilishicha, u aholiga namuna bo‘lib emlashni birinchi olgan va olayotgan bosh shifokorlar ro‘yxati bilan ham qiziqqan.
“Men kecha so‘radim, qani qaysi bosh shifokor birinchi bo‘lib emlashni oldi. O‘zi odamlarga namuna bo‘lyaptimi? Men qaysi bosh shifokor emlashni olayotganini so‘radim, bugun kechki payt (2021-yil 2-aprel nazarda tutilmoqda) ro‘yxatini berishsa, aniq bo‘ladi”, — dedi hokim Zoir Mirzayev.
Izoh (0)