Ijtimoiy tarmoqlarda “GAIning duxini sindirish bo‘yicha master-klass” sarlavhasi ostida videolavha tarqalgani va holat yuzasidan Toshkent viloyati IIBB THXB tomonidan surishtiruv harakatlari olib borilayotgani to‘g‘risida xabar berilgandi. IIV YHXBB axborot xizmatining ma’lum qilishicha, huquqbuzarlik sodir etgan haydovchiga nisbatan ma’muriy qamoq jazosi belgilangan.
Ma’lum qilinishicha, 31-mart kuni Toshkent viloyati IIBB YHXB YPX xodimi A.Abdurahimov 4R6 Toshkent—Chimyon avtomobil yo‘lining 17-kilometrida haydovchi, 1988-yilda tug‘ilgan A.S. boshqaruvidagi DAF TE 105 XF rusumli yuk avtomobilini to‘xtatgan. Bunga yuk mashinasi svetoforning taqiqlovchi qizil chirog‘ida harakatlangani sabab bo‘lgan.
YPX inspektori yuk mashina haydovchisiga qoidabuzarlik sodir etilganini aytgan va hujjatlarini taqdim etishini so‘ragan. Biroq haydovchi A.S. inspektorning qonuniy talabiga bo‘ysunmasdan, avtomobilni haydab ketib qolgan. Inspektor aloqa vositasi orqali keyingi chorrahada turgan boshqa bir inspektordan yuk mashinasini to‘xtatishni so‘ragan va o‘zi ham o‘sha yerga yetib borgan. Biroq haydovchi bu yerda ham hujjatlarini taqdim etmasdan, inspektor bilan tortishgan, uni telefoniga tasvirga olgan.
Shundan so‘ng inspektor ikki nafar xolis ishtirokida yuk mashina haydovchisi A.S.dan yana hujjatlarini so‘ragan va hujjatlar taqdim etilgach, qoidabuzarlik bo‘yicha belgilangan tartibda bayonnoma rasmiylashtirgan.
Qoidabuzarlikka nisbatan qonuniy chora ko‘rilgani haydovchiga yoqmagan va u biroz o‘tib, qo‘lida tosh bilan qaytib kelgan. U bilan talashib, haqoratlab, so‘kinib, hujum qilmoqchidek harakatlar sodir etib, noroziligini bildirgan.
Qibray tumani IIB tomonidan ushbu haydovchi topib kelingan va u bilan suhbat o‘tkazilgan. Hujjatlar rasmiylashtirilib, sudga yuborilgan.
2-aprel kuni Jinoyat ishlari bo‘yicha Qibray tuman sudida fuqaro A.S. Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) 1-qismida ko‘rsatilgan huquqbuzarliklarni sodir etgan deya topilib, unga nisbatan 15 sutka ma’muriy qamoq jazosi belgilangan.
Avvalroq Toshkentda qoidabuzar avtoblogerni chora ko‘rmay, qo‘yib yuborgan YPX xodimi va uning boshlig‘iga chora ko‘rilgani to‘g‘risida xabar berilgandi.
Izoh (0)