Xitoy 25 yil davomida barqaror neft ta’minoti evaziga Eron iqtisodiyotiga 400 milliard dollar investitsiya kiritishga rozi bo‘ldi. Bu haqda The New York Times nashri xabar berdi.
NYT’ning to‘plagan ma’lumotlariga ko‘ra, Xitoy hukumati Eronning banklari, telekommunikatsiyasi, portlari, temiryo‘llari, sog‘liqni saqlash va axborot texnologiyalari sohasiga investitsiya kiritadi.
Eronlik amaldorning so‘zlariga ko‘ra, evaziga Xitoyga muntazam ravishda, katta chegirma bilan neft yetkazib berish ko‘zda tutilgan.
Shuningdek, loyiha qo‘shma mashg‘ulotlar va darslar, qurollarni birgalikda o‘rganish va rivojlantirish hamda razvedka ma’lumotlarini o‘z ichiga oluvchi harbiy hamkorlikni chuqurlashtirishni ham nazarda tutadi.
Avvalroq Eron AQShning Tehronga qarshi sanksiyalari bekor qilinmaguncha uranni boyitish darajasini 20 foizdan tushirmasligini ma’lum qilgani haqida xabar berilgan edi. “Uranning 20 foizga boyitilishi yadroviy bitimning 36-bandiga mos keladi va agar AQSh barcha sanksiyalarni bekor qilsagina, bu foiz pasaytiriladi”, — dedi hukumat vakili.
Shuningdek, Yevropa Ittifoqining doimiy vakillari qo‘mitasi Eronda inson huquqlarining poymol qilinish holatlari kuzatilgan deb gumon qilgan holda sakkiz nafar jismoniy va uch yuridik shaxsga nisbatan cheklov choralarini qo‘llash haqida qaror chiqardi. Sanksiyalar Yevroittifoq kengashi tomonidan rasman tasdiqlanganidan keyin, yaqin kunlar ichida kuchga kiradi. Cheklovlar Eronda 2019-yilda bo‘lib o‘tgan norozilik namoyishlarini ayovsiz bostirish bilan bog‘liq harakatlar sabab joriy qilinadi.
Izoh (0)