Slovakiyada “Sputnik V” vaksinasi bilan bog‘liq mojarodan keyin yangi hukumat tarkibi tasdiqlandi

Slovakiya prezidenti Zuzana Chaputova 1-aprel kuni bosh vazir Eduard Xeger rahbarligidagi yangi hukumat tarkibini tasdiqladi. Bu haqda “TASS” xabar berdi.

Xabarga ko‘ra, Vazirlar Mahkamasining tarkibini tasdiqlash bo‘yicha tantanali marosim Bratislavadagi Prezident saroyida o‘tkazilgan va mahalliy telekanallar tomonidan translyatsiya qilingan.

Marosim davomida Xeger Slovakiya konstitutsiyasi va qonunlariga sodiqlik bilan xizmat qilishga qasamyod qilgan.

Slovakiyaning yangi hukumati tarkibiga to‘rtta siyosiy birlashmaning vakillari, jumladan, Oddiy odamlar va mustaqil shaxslar partiyasi, Odamlar uchun liberal-konservativ partiyasi, Ozodlik va bag‘rikenglik liberal partiyasi hamda Biz bir oilamiz siyosiy harakati a’zolari kiritilgan. Eduard Xeger Oddiy odamlar va mustaqil shaxslar partiyasining yetakchilaridan biri hisoblanadi.

Eslatib o‘tamiz, bir necha kun avval Slovakiya prezidenti “Sputnik V” vaksinasi bilan bog‘liq mojaro tufayli bosh vazir Igor Marovich iste’fosini qabul qilgandi. Undan avval Slovakiya sog‘liqni saqlash vaziri Marek Kraychi iste’fo bergan.

Slovakiya Yevropa Ittifoqida “Sputnik V”ni Yevropa dori-darmon agentligi (EMA) ma’qullashidan oldin tasdiqlagan Vengriyadan keyingi ikkinchi mamlakatga aylangandi. “Sputnik V”ga buyurtma berish Slovakiyaning hukmron koalitsiyasida tortishuvlarga sabab bo‘ldi. Koalitsiyadagi to‘rtta partiyadan ikkitasi EMA’ning ruxsatini kutishni talab qilgan.

Slovakiya sobiq bosh vaziri mart oyi boshida Igor Matovich koronavirusga qarshi “Sputnik V” vaksinasi evaziga Rossiyaga Ukrainaning Zakarpatye viloyatini bermoqchiligini aytib, hazil qilgan. Ukraina tashqi ishlar vazirligi Matovichdan aytgan so‘zlari uchun rasmiy ravishda kechirim so‘rashni talab qildi. Matovich “noo‘rin gapi” uchun “barcha ukrainaliklardan” kechirim so‘ragan.