2020-yilda O‘zbekistonga amalga oshirilgan pul o‘tkazmalari 5,9 milliard dollarni tashkil etdi. Bu haqda Markaziy bank hisobotida so‘z boradi.
Bu undan oldingi to‘rt yilda qayd etilgan ko‘rsatkichlardan yuqori, biroq 2013 va 2014-yilgidan kam — o‘shanda mamlakatda mos ravishda 7,5 milliard hamda 6,5 milliard dollarli o‘tkazmalar amalga oshirilgan.
Shunday qilib, prognozlarga qaramay, pandemiya O‘zbekistonga amalga oshirilgan pul o‘tkazmalarining qisqarishiga ta’sir ko‘rsatmagan. Jahon banki tahlilchilari, o‘rta va past darajadagi daromadga ega mamlakatlarga pul o‘tkazmalari hajmi 19,7 foizga qisqarishini prognoz qilgandi.
Prognozlar bo‘yicha, koronavirus pandemiyasi va 2020-yilda neft narxining tushib etishi ta’sirida mintaqadagi pul o‘tkazmalari qariyb 28 foizga qisqarishi kerak edi. Rossiyadan amalga oshiriladigan pul o‘tkazmalariga kuchli bog‘liq bo‘lgan mamlakatlar, jumladan, O‘zbekiston iqtisodiyotiga ham tashqi shoklar salbiy ta’sir ko‘rsatishi mumkinligi aytilgandi.
Avvalroq O‘zbekistonga yuborilayotgan pul o‘tkazmalari oqimida o‘sish kuzatilgani, endi mehnat muhojirlari ko‘proq maosh ola boshlagani to‘g‘risida xabar berilgandi.
Izoh (0)