1 апрель куни қайта тикланувчи энергия манбаларини ривожлантириш бўйича етакчи халқаро компаниялардан бири бўлган БААнинг Masdar компанияси томонидан Навоий вилоятининг Зарафшон шаҳрида шамол электр станцияси қурилишига тамал тоши қўйилди. Бу ҳақда Энергетика вазирлиги хабар берди.
Тадбир доирасида Masdar компанияси, Инвестициялар ва ташқи савдо вазирлиги ҳамда Ўзбекистон Энергетика вазирлиги ўртасида қурилаётган электр станциясининг лойиҳавий қувватини 500 мегаваттдан 1,5 гигаваттгача ошириш бўйича битим имзоланган.
Дастлаб 600 миллион долларга баҳоланган лойиҳа кенгайтирилгандан сўнг қарийб 1,8 миллиард доллар миқдорида тўғридан-тўғри хорижий инвестицияларни жалб этиши кутилмоқда.
Зарафшондаги шамол электр станцияси 2024 йилнинг охиригача тижорий фойдаланишга топширилиши кутилмоқда. 500 мегаватт қувватга эга лойиҳа 500 мингта хонадонга етарли ҳажмда электр энергияни ишлаб чиқаришни ва атмосферага чиқариладиган карбонат ангидрид чиқиндиларини йилига 1,1 миллион тоннага камайтиришни таъминлаб бериши кўзда тутилган эди. Эндиликда бу рақамлар мос равишда 1,5 миллион хонадон ва 3,3 миллион тонна карбонат ангидридга кўпаяди.
Эслатиб ўтамиз, 2020 йилда Masdar компанияси Ўзбекистон ҳукумати билан Навоий вилоятининг Зарафшонда қуввати 500 МВт бўлган Марказий Осиёдаги энг йирик шамол электр станцияси лойиҳасини ишлаб чиқиш, уни қуриш ва ундан фойдаланиш бўйича икки томонлама битимлар имзолаган. Станция компаниянинг муқобил энергетика соҳасида минтақадаги иккинчи лойиҳаси бўлади.
Мавзуга доир: Сирдарёда табиий газни икки баробар иқтисод қилган ҳолда электр энергияси ишлаб чиқарадиган ИЭС қурилиши бошланди
Изоҳ (0)