Yevropa mintaqasida JCh—2022 saralashi 3-turi doirasidagi bir qator uchrashuvlar 31-mart, chorshanba kuni bo‘lib o‘tdi.
B guruhi vakili Ispaniya o‘z maydonida Kosovoni qabul qildi va 3:1 hisobida g‘alaba qozondi. Uchrashuvda ispanlar tomonidan kiritilgan gollarga Dani Olmo, Ferran Torres va Xerard Moreno mualliflik qildi. Mehmonlarning yagona javob to‘pi esa Besar Halimi hisobiga yozildi. Ushbu g‘alabadan keyin ochkolari 7 taga yetgan ispanlar guruhda peshqadamlik qilmoqda. Birorta ham ochko qo‘lga kiritmagan Kosovo esa so‘nggi pog‘onani band etgan.
C guruhidan o‘rin olgan o‘yinda Italiya terma jamoasi Litva maydoniga safar qildi va Stefano Sensi hamda Chiro Immobilening gollari evaziga g‘alabani tantana qildi. Jamoa 3-turdan keyin 100 foizlik natija qayd etgan holda guruhda peshqadamlik qilmoqda. Litva esa so‘nggi o‘rindan joy olgan.
D guruhidagi bahsda Fransiya Bosniya va Gersegovina maydoniga safar qilib, 1:0 hisobidagi g‘alabaga erishdi. “Uch-ranglilar”ning yagona goli Antuan Grizmann hisobiga yozildi. Mazkur g‘alabadan keyin fransuzlarning ochkolari 7 taga yetdi. Jamoa guruh peshqadami hisoblanadi. Bosniya va Gersegovina termasi Qozog‘iston bilan oxirgi o‘rinlarni bo‘lishib turibdi.
I guruhining markaziy o‘yinida Angliya hamda Polsha jamoalari o‘zaro kuch sinashdi. Uchrashuv inglizlarning g‘alabasi bilan yakunlandi. Angliyadan Harri Keyn va Harri Maguayr gol urgan bo‘lsa, Polshaning javob to‘piga Yakub Moder mualliflik qildi. Mazkur bahsda jarohati sabab Polsha hujumchisi Robert Levandovski ishtirok etmadi. Guruhda Angliya 9 ochko bilan birinchi o‘rinda bormoqda. Polsha esa 4 ochko bilan 4-o‘rinda joylashgan.
J guruhida Germaniya terma jamoasi Shimoliy Makedoniyani qabul qilib, 1:2 hisobida imkoniyatni boy berib qo‘ydi. Mehmonlar safida Goran Pandev va Elif Elmaz o‘z nomini tabloga yozdirib qo‘ydi. Ilkay Gundo‘g‘on esa 11 metrlik jarima zarbasini aniq amalga oshirib, hisobni qisqartirdi. Ushbu g‘alabadan keyin Shimoliy Makedoniya 6 ochko bilan 2-o‘ringa ko‘tarildi. Xuddi shuncha ochko jamg‘argan Germaniya 3-o‘rinda bormoqda.
JCh—2022 saralashi
3-tur bahslari
31-mart, chorshanba
Armaniston — Ruminiya 3:2
Gollar: 1:0 – 56 Spersyan, 1:1 – 62 Chikildeu, 1:2 – 72 Chikildeu, 2:2 – 86 Aroyan, 3:2 – 89, penalti Barsegyan.Lixtenshteyn – Islandiya 1:4
Gollar: 0:1 – 12 Sayvarsson, 0:2 – 45 Byarnason, 0:3 – 77 Paulsson, 1:3 – 79 Frik, 1:4 – 90, penalti Siguryonsson.Germaniya – Shimoliy Makedoniya 1:2
Gollar: 0:1 – 45+2 Pandev, 1:1 – 63, penalti Gundo‘g‘an, 1:2 – 85 Elmaz.San-Marino – Albaniya 0:2
Gollar: 0:1 – 63 Manay, 0:2 – 85 Uzuni.Angliya – Polsha 2:1
Gollar: 1:0 – 19, penalti Keyn, 1:1 – 58 Moder, 2:1 – 85 Maguayr.Andorra – Vengriya 1:4
Gollar: 0:1 – 45 Fiola, 0:2 – 51 Gazdag, 0:3 – 58 Klyaynxaysler, 0:4 – 90 Nego, 1:4 – 90, penalti Puxol.Shotlandiya – Farer orollari 4:0
Gollar: 1:0 – 7 Makginn, 2:0 – 53 Makginn, 3:0 – 60 Adams, 4:0 – 70 Freyzer.Moldova – Isroil 1:4
Gollar: 1:0 – 29 Karp, 1:1 – 45 Zaxavi, 1:2 – 57 Solomon, 1:3 – 64 Dabbur, 1:4 – 66 Natxo.Avstriya – Daniya 0:4
Gollar: 0:1 – 58 Olsen, 0:2 – 63 Mele, 0:3 – 67 Hyoybyerg, 0:4 – 73 Olsen.Ukraina – Qozog‘iston 1:1
Gollar: 1:0 – 20 Yaremchuk, 1:1 – 59 Mujikov.Bosniya va Gersegovina – Fransiya 0:1
Gol: 0:1 — 60 Grizmann.Shimoliy Irlandiya – Bolgariya 0:0.
Izoh (0)