Европа минтақасида ЖЧ—2022 саралаши 3-тури доирасидаги бир қатор учрашувлар 31 март, чоршанба куни бўлиб ўтди.
B гуруҳи вакили Испания ўз майдонида Косовони қабул қилди ва 3:1 ҳисобида ғалаба қозонди. Учрашувда испанлар томонидан киритилган голларга Дани Олмо, Ферран Торрес ва Херард Морено муаллифлик қилди. Меҳмонларнинг ягона жавоб тўпи эса Бесар Ҳалими ҳисобига ёзилди. Ушбу ғалабадан кейин очколари 7 тага етган испанлар гуруҳда пешқадамлик қилмоқда. Бирорта ҳам очко қўлга киритмаган Косово эса сўнгги поғонани банд этган.
C гуруҳидан ўрин олган ўйинда Италия терма жамоаси Литва майдонига сафар қилди ва Стефано Сенси ҳамда Чиро Иммобиленинг голлари эвазига ғалабани тантана қилди. Жамоа 3-турдан кейин 100 фоизлик натижа қайд этган ҳолда гуруҳда пешқадамлик қилмоқда. Литва эса сўнгги ўриндан жой олган.
D гуруҳидаги баҳсда Франция Босния ва Герцеговина майдонига сафар қилиб, 1:0 ҳисобидаги ғалабага эришди. «Уч-ранглилар»нинг ягона голи Антуан Гризманн ҳисобига ёзилди. Мазкур ғалабадан кейин французларнинг очколари 7 тага етди. Жамоа гуруҳ пешқадами ҳисобланади. Босния ва Герцеговина термаси Қозоғистон билан охирги ўринларни бўлишиб турибди.
I гуруҳининг марказий ўйинида Англия ҳамда Польша жамоалари ўзаро куч синашди. Учрашув инглизларнинг ғалабаси билан якунланди. Англиядан Ҳарри Кейн ва Ҳарри Магуайр гол урган бўлса, Польшанинг жавоб тўпига Якуб Модер муаллифлик қилди. Мазкур баҳсда жароҳати сабаб Польша ҳужумчиси Роберт Левандовски иштирок этмади. Гуруҳда Англия 9 очко билан биринчи ўринда бормоқда. Польша эса 4 очко билан 4-ўринда жойлашган.
Ж гуруҳида Германия терма жамоаси Шимолий Македонияни қабул қилиб, 1:2 ҳисобида имкониятни бой бериб қўйди. Меҳмонлар сафида Горан Пандев ва Элиф Элмаз ўз номини таблога ёздириб қўйди. Илкай Гундўғон эса 11 метрлик жарима зарбасини аниқ амалга ошириб, ҳисобни қисқартирди. Ушбу ғалабадан кейин Шимолий Македония 6 очко билан 2-ўринга кўтарилди. Худди шунча очко жамғарган Германия 3-ўринда бормоқда.
ЖЧ—2022 саралаши
3-тур баҳслари
31 март, чоршанба
Изоҳ (0)