“Borussiya D” klubi hujumchisi Erling Holandning agenti Mino Rayola 1-aprel kuni Barselonaga bordi.
U bilan birga futbolchining otasida Alf-Inge Holand ham Ispaniyaga uchib kelgan. Aeroportda ularni “Barselona” prezidenti Xoan Laportaga tegishli kishi kutib olgan. Rayola va Holandning Kataloniya aeroportida ko‘rinish bergani haqida Diario Sport, Mundo Deportivo kabi katalon nashrlari, shuningdek, insayder Fabritsio Romano xabar qildi.
Fabritsio Romanoga ko‘ra, tomonlar o‘rtasidagi uchrashuv pozitiv ruhda o‘tgan. Biroq bu muzokaralarning boshlang‘ich bosqichi, xolos. Hali tomonlar kelishuvdan ancha yiroqda.
Shuningdek, italiyalik jurnalistning aytishicha, Rayola futbolchiga xaridor bo‘lgan boshqa klublar bilan ham shu tariqa muzokara olib boradi.
Avvalroq “Barselona” 20 yoshli norvegiyalik futbolchi transferiga qiziqish bildirayotgani xabar qilingandi. “Borussiya” Holandni 180 million yevroga baholamoqda.
Holandga “Real”, “Chelsi” va Manchester shahri klublaridan ham qiziqish bor.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)