Namanganda ikki nafar farzandini Sirdaryo daryosiga tashlamoqchi bo‘lgan ayol to‘xtatildi, deya xabar qilmoqda Milliy gvardiya matbuot xizmati.
Xabarga ko‘ra, 28-mart kuni soat 09:30 larda Namangan viloyati To‘raqo‘rg‘on tumanida yashovchi 42 yoshli ayol ikki nafar (6 va 3 yoshdagi) farzandlarini daryoga tashlamoqchi bo‘lgan.
Fuqaro A.Sh. Mingbuloq tumanidan oqib o‘tuvchi Sirdaryo daryosi ustida joylashgan ko‘prikdan bolalarini suvga tashlamoqchi bo‘lgan vaqtda ushbu hududda xizmat o‘tayotgan Qo‘riqlash boshqarmasi 2-alohida otryad xodimlari tomonidan to‘xtatib qolingan.
Holat bo‘yicha To‘raqo‘rg‘on tuman IIB, tuman hokimiyat vakillari va oila a’zolariga xabar berilgan. Hozirda tuman IIB mas’ul xodimlari tomonidan surishtiruv ishlari davom etmoqda.
Bundan avval Shirin shahar hokimligi “hayotdan charchab”, ikki bolasini kanalga oqizib yubormoqchi bo‘lgan ayol voqeasi bo‘yicha izoh bergani, Navoiyda 31 yoshli ayol o‘zi va uch nafar qizining joniga suiqasd qilgani va uning eri doimiy ravishda ayolga o‘g‘il farzand tug‘magani uchun haqoratlab kelgani bunga sabab bo‘lgani haqida xabar berilgandi.
Izoh (0)