Fransiyaning Luvr muzeyi 482 mingdan iborat barcha san’at asarlari kolleksiyasini raqamlashtirdi va ochiq saytda ommaga taqdim etdi. Onlayn arxiv doimiy ravishda yangilanib va boyitib boriladi. Bu haqda CNN nashriga tayanib, “Korrespondent.net” xabar berdi.
Foto: Unsplash
“Bugun Luvr o‘z xazinalari changini tozaladi, hatto eng kam ma’lum bo‘lganlarining ham. Birinchi marta xohlovchilar barcha kolleksiyalarni, san’at asarlari muzeyda namoyish etilgan-etilmagani, vaqtincha foydalanish uchun olingan yoki omborda saqlanayotganidan qat’i nazar, smartfon yoki kompyuter orqali bepul tomosha qilishi mumkin. Ishonchim komil, mazkur raqamli kontent odamlarning Luvrga tashrif buyurishiga va kolleksiyalar bilan bevosita tanishishiga turtki bo‘ladi”, — dedi muzey prezidenti Jan-Lyuk Martines.
Shuningdek, onlayn baza Tyuilri bog‘idagi haykallar va Ikkinchi jahon urushidan keyin qayta tiklangan san’at asarlarini o‘z ichiga oladi. Saytda faqat Luvrda taqdim etilgan ishlar emas, balki vaqtincha foydalanish yoki saqlash uchun olingan san’at namunalari ham mavjud.
Bundan tashqari, endi uydan chiqmagan holda interaktiv xarita yordamida Luvr muzeyiga tashrif buyurish mumkin.
Luvr muzeyi hali ham tashrif buyuruvchilar uchun yopiq, lekin muzeyda uzoq vaqtdan rejalashtirilgan ta’mirlash ishlari amalga oshirilmoqda.
Ma’lumot uchun, Kryoller-Myuller va Amsterdamdagi Van Gog muzeylari, shuningdek, Niderlandiya San’at tarixi instituti ham Vinsent Van Gog ijodiga bag‘ishlangan onlayn arxiv tashkil qildi. Tarmoqqa muzeylar jamg‘armasidan rassomning mingdan ortiq ishi joylandi.
Avvalroq Luvr muzeyi Leonardo da Vinchining “Mona Liza”sini himoya oynasisiz ko‘rish imkoniyatini auksionda sotgan edi.
