Namangan shahrida joylashgan “Pekin” tibbiyot markazida ishlovchi Xitoy fuqarolariga nisbatan bosqinchilik sodir etib, ularning qariyb 20 ming dollar pulini qo‘lga kiritgan shaxslar qo‘lga olindi, deb xabar beradi Tergov departamenti.
Ma’lum qilinishicha, 24-mart kuni soat 03:40 da noma’lum shaxslar shaharning “Qadamjoy” MFYda joylashgan “Pekin” tibbiyot markazi binosiga yuzlariga qora rangli tibbiyot niqobi taqqan holda g‘ayriqonuniy ravishda kirgan. Ular binoning ikkinchi qavatidagi yotoqxonada uxlab yotgan shu markazda shifokor bo‘lib ishlovchi ikki nafar Xitoy fuqarosi hamda ushbu markaz tarjimoni Yahyoxon U.ni urib, qo‘l va oyoqlarini skotch bilan bog‘lagan. Shundan so‘ng, bosqinchilar yotoqxonadagi “tumbochka” qulfini buzib 10 ming AQSh dollari, 100 million so‘m pul mablag‘lari hamda ikki dona Huawei va Redmi 8 rusumli uyali telefon apparatlarini qo‘lga kiritib hodisa joyidan yashiringan.
Mazkur holat yuzasidan Namangan shahri bo‘yicha IIO FMB huzuridagi Tergov bo‘limi tomonidan Jinoyat kodeksining 164-moddasini 4-qismi “a” bandi (bosqinchilik) bilan jinoyat ishi qo‘zg‘atilgan.
Olib borilgan tergov-tezkor qidiruv harakatlari davomida ushbu jinoyatni Farg‘ona viloyatida yashovchi muqaddam sudlangan 31 yoshli Jahongir K. boshchiligida 29 yoshli Habibullo K., 24 yoshli Izzatillo A., Asrorbek Q., hamda Andijon viloyatida yashovchi 20 yoshli Abdullo X. sodir etganliklari aniqlangan. Gumonlanuvchilar protsessual tartibda ushlanib, ularning yoni ko‘zdan kechirilganda jami 10,62 million so‘m pullar ashyoviy dalil tariqasida rasmiylashtirib olingan.
Tergov harakatlari jarayonida Andijon viloyatida yashovchi Abdullo X. muqaddam mazkur markaz shifokorlari yaxshi daromad qilayotganidan xabar topib, binoning kalitini g‘ayriqonuniy ravishda qo‘lga kiritib, bu haqida tanishi Jahongir K.ga aytib qiziqtirgani ma’lum bo‘lgan.
Hozirda tergov davom etmoqda. Ta’kidlanishicha, bu turdagi jinoyatlar uchun Jinoyat kodeksining normalariga ko‘ra, 15 yildan 20 yilgacha ozodlikdan mahrum qilish jazosi tayinlanadi.
Avvalroq Yangiyo‘lda homilador ayolni bog‘lab qo‘yib, bosqinchilik uyushtirgan 5 kishi qo‘lga olingani, Andijonda 28 yoshli ayolning uyiga bostirib kirib, pul talab qilgan fuqarolarga sud hukmi o‘qilgani, Ohangaronda fermer xo‘jaligiga bostirib kirib, ishchilar mulkini talon-toroj qilgan shaxslar hibsga olingani to‘g‘risida xabar berilgandi.
Izoh (0)