Наманган шаҳрида жойлашган «Пекин» тиббиёт марказида ишловчи Хитой фуқароларига нисбатан босқинчилик содир этиб, уларнинг қарийб 20 минг доллар пулини қўлга киритган шахслар қўлга олинди, деб хабар беради Тергов департаменти.
Маълум қилинишича, 24 март куни соат 03:40 да номаълум шахслар шаҳарнинг «Қадамжой» МФЙда жойлашган «Пекин» тиббиёт маркази биносига юзларига қора рангли тиббиёт ниқоби таққан ҳолда ғайриқонуний равишда кирган. Улар бинонинг иккинчи қаватидаги ётоқхонада ухлаб ётган шу марказда шифокор бўлиб ишловчи икки нафар Хитой фуқароси ҳамда ушбу марказ таржимони Яҳёхон У.ни уриб, қўл ва оёқларини скотч билан боғлаган. Шундан сўнг, босқинчилар ётоқхонадаги «тумбочка» қулфини бузиб 10 минг АҚШ доллари, 100 миллион сўм пул маблағлари ҳамда икки дона Huawei ва Redmi 8 русумли уяли телефон аппаратларини қўлга киритиб ҳодиса жойидан яширинган.
Мазкур ҳолат юзасидан Наманган шаҳри бўйича ИИО ФМБ ҳузуридаги Тергов бўлими томонидан Жиноят кодексининг 164-моддасини 4-қисми «а» банди (босқинчилик) билан жиноят иши қўзғатилган.
Олиб борилган тергов-тезкор қидирув ҳаракатлари давомида ушбу жиноятни Фарғона вилоятида яшовчи муқаддам судланган 31 ёшли Жаҳонгир К. бошчилигида 29 ёшли Ҳабибулло К., 24 ёшли Иззатилло А., Асрорбек Қ., ҳамда Андижон вилоятида яшовчи 20 ёшли Абдулло Х. содир этганликлари аниқланган. Гумонланувчилар процессуал тартибда ушланиб, уларнинг ёни кўздан кечирилганда жами 10,62 миллион сўм пуллар ашёвий далил тариқасида расмийлаштириб олинган.
Тергов ҳаракатлари жараёнида Андижон вилоятида яшовчи Абдулло Х. муқаддам мазкур марказ шифокорлари яхши даромад қилаётганидан хабар топиб, бинонинг калитини ғайриқонуний равишда қўлга киритиб, бу ҳақида таниши Жаҳонгир К.га айтиб қизиқтиргани маълум бўлган.
Ҳозирда тергов давом этмоқда. Таъкидланишича, бу турдаги жиноятлар учун Жиноят кодексининг нормаларига кўра, 15 йилдан 20 йилгача озодликдан маҳрум қилиш жазоси тайинланади.
Аввалроқ Янгийўлда ҳомиладор аёлни боғлаб қўйиб, босқинчилик уюштирган 5 киши қўлга олингани, Андижонда 28 ёшли аёлнинг уйига бостириб кириб, пул талаб қилган фуқароларга суд ҳукми ўқилгани, Оҳангаронда фермер хўжалигига бостириб кириб, ишчилар мулкини талон-торож қилган шахслар ҳибсга олингани тўғрисида хабар берилганди.
Изоҳ (0)