Samarqand viloyati Ekologiya va atrof-muhitni muhofaza qilish boshqarmasi axborot xizmati rahbari Sherali Iskandarov 27-mart kuni avtomobil yo‘lida sher bolasi topib olingani aytilgan xabarga rasmiy munosabat bildirdi. Bu haqda “Zamon” informatsion dasturi xabar qildi.
Ma’lum qilinishicha, videoda ko‘rsatilgan sher bolasi, aytilayotganidek, topib olingani yo‘q, balki ushlab qolingan. Samarqand viloyati Ekologiya va atrof-muhitni muhofaza qilish hamda viloyat Ichki ishlar boshqarmalari hamkorligida o‘tkazilayotgan reyd davomida Qashqadaryodan Andijonga harakatlanayotgan avtomashina tekshirilganda, unda sher bolasi olib ketilayotgani aniqlangan.
“Qashqadaryolik va andijonlik ikki shaxs Nexia-2 rusumli avtoulov yukxonasida taxminan 1,5 yoshlik Afrika sher bolasini Andijonga olib ketilayotgani aniqlandi. Hayvon IIBB qoshidagi Kinologiya bo‘limiga olib borilgan.
Haydovchi vaziyatdan qutulish uchun sher bolasi yotgan yukxonani harakat vaqtida ochib, hayvonni qochirib yubormoqchi bo‘lgan. IIO xodimlari mashinani zudlik bilan to‘xtatib, sherni qayta ushlab, mashinaga solib, olib ketilgan”, – deydi Sherali Iskandarov.
Sher bolasining bir oyog‘i lat yegani aniqlangan va hozirda davo choralari ko‘rilmoqda. Muolajalardan so‘ng sher bolasi 29-mart kuni Toshkent hayvonot bog‘iga topshiriladi.
Sherni egasi sifatida ushlangan shaxslarda ushbu hayvonni boqish va parvarishlash uchun hech qanday hujjati yo‘qligi aniqlangan. Hozirda tergovga qadar surishtiruv ishlari olib borilmoqda.
Bundan avval Rossiyada egasidan qochib ketgan ayiq ko‘chadagi yo‘lovchilarni quvlashga tushgani, Tataristonda sirk tomoshasi paytida fillar urishib ketgani hamda Yunusobodda daraxtga osilib qolgan cho‘l burguti qutqarilgani haqida xabar berilgandi.
Izoh (0)