“Mendirman Jaloliddin” serialidagi Turkon xotun — aktrisa Gulenay Kalkan haqidagi qiziqarli ma’lumotlar (foto)

Gulenay Kalkan Turkiyaning mashhur teatr va televideniye aktrisasi. U “Bugunning amaldorlari” va “Eringiz kabi gapiring” seriallarini suratga olgandan so‘ng mashhur bo‘ldi. Aktrisa o‘zbek tomoshabinlariga “Mendirman Jaloliddin” tarixiy seriali orqali tanish. U serialda Jaloliddinning buvisi Turkon xotun rolini ijro etgan.

Gulenay Kalkan bolaligidanoq qaysi sohani tanlashi aniq edi. U 14 yoshida Anqara davlat konservatoriyasining teatr bo‘limiga o‘qishga kiradi. Konservatoriyani tugatgach, Kalkan Anqarada qolishga va teatr aktrisasi bo‘lishga qaror qiladi. Unga bir necha bor Istanbulga ko‘chib o‘tish bo‘yicha takliflar bo‘lgan, ammo Gulenay ona shahridan ketishni istamagan.

Ishonish qiyin, lekin Gulenay Kalkan televideniyedagi ilk debyut rolini 48 yoshida ijro etgan. Ilgari u faqat teatr sahnasida o‘ynagan va 1991-yildagi bir filmida epizodik rol ijro etgan. Buning ortidan bir necha loyihalarda ishtirok etgan aktrisaga haqiqiy mashhurlikni “Mening onam” teleseriali olib kelgan.

Gulenay Kalkanni televideniyega kelishiga uning turmush o‘rtog‘i aktyor Tariq Unluo‘g‘lu sababchi bo‘lgan. Turkiyaning bu ikki aktyorini kino qilishga arziydigan g‘aroyib sevgi qissasi bog‘lab turgan. Gulenay va Tarik 1988-yilda ikkalasi Anqarada yashagan, hali unchalik mashhur bo‘lmagan vaqtda tanishgan. Keyin Tarik ishlab topgan bor pulini sevgilisi bilan bo‘lgan romantik sayohatga sarflaydi.

Sayohat davomida juftlik turmush qurishga qaror qilishadi. To‘y Gretsiyaning Kos oroli yaqinida bo‘lgan kemada o‘tkazilib, kema kapitani ularni nikohlab qo‘yadi.

Bir necha yil o‘tgach, uy olish uchun hujjatlarni rasmiylashtirish zarur bo‘lganda ularning nikohlari qayd etilmagani ma’lum bo‘ladi. 2012-yilda Gulenay va Tarik nihoyat Istanbulga ko‘chib o‘tadi, oradan bir yil o‘tib, ya’ni uchrashganlaridan roppa-rosa 25 yil o‘tgach esa rasmiy ravishda nikohdan o‘tishadi.

Ammo ko‘p o‘tmay Tarikka o‘pka saratoni tashxisi qo‘yiladi. Aktyor 2019-yilda vafot etgach, Gulenay Kalkanga ayriliqda yashash juda qiyin bo‘ldi. OAVda yozilishicha, aktrisa nikoh uzugini ko‘rsatib, uni hech qachon yechmasligini aytgan.

Kinodagi ijodiy faoliyati Kalenga yana hayotga qaytishida yordam berdi. Aktrisa “Mendirman Jaloliddin” tarixiy dramasining birinchi mavsumida Jaloliddinning buvisi Turkon xotun rolini ijro etdi. Aktrisa seriallardan bo‘layotgan takliflarni rad etmoqchi emas. Uning aytishicha, aktrisani boshqa mashhur turk teleloyihalarida ham uchratib qolish mumkin.