«Мендирман Жалолиддин» сериалидаги Туркон хотун — актриса Гуленай Калкан ҳақидаги қизиқарли маълумотлар (фото)

Гуленай Калкан Туркиянинг машҳур театр ва телевидение актрисаси. У «Бугуннинг амалдорлари» ва «Эрингиз каби гапиринг» сериалларини суратга олгандан сўнг машҳур бўлди. Актриса ўзбек томошабинларига «Мендирман Жалолиддин» тарихий сериали орқали таниш. У сериалда Жалолиддиннинг бувиси Туркон хотун ролини ижро этган.

Гуленай Калкан болалигиданоқ қайси соҳани танлаши аниқ эди. У 14 ёшида Анқара давлат консерваториясининг театр бўлимига ўқишга киради. Консерваторияни тугатгач, Калкан Анқарада қолишга ва театр актрисаси бўлишга қарор қилади. Унга бир неча бор Истанбулга кўчиб ўтиш бўйича таклифлар бўлган, аммо Гуленай она шаҳридан кетишни истамаган.

Ишониш қийин, лекин Гуленай Калкан телевидениедаги илк дебют ролини 48 ёшида ижро этган. Илгари у фақат театр саҳнасида ўйнаган ва 1991 йилдаги бир фильмида эпизодик рол ижро этган. Бунинг ортидан бир неча лойиҳаларда иштирок этган актрисага ҳақиқий машҳурликни «Менинг онам» телесериали олиб келган.

Гуленай Калканни телевидениега келишига унинг турмуш ўртоғи актёр Тариқ Унлуўғлу сабабчи бўлган. Туркиянинг бу икки актёрини кино қилишга арзийдиган ғаройиб севги қиссаси боғлаб турган. Гуленай ва Тарик 1988 йилда иккаласи Анқарада яшаган, ҳали унчалик машҳур бўлмаган вақтда танишган. Кейин Тарик ишлаб топган бор пулини севгилиси билан бўлган романтик саёҳатга сарфлайди.

Саёҳат давомида жуфтлик турмуш қуришга қарор қилишади. Тўй Грециянинг Кос ороли яқинида бўлган кемада ўтказилиб, кема капитани уларни никоҳлаб қўяди.

Бир неча йил ўтгач, уй олиш учун ҳужжатларни расмийлаштириш зарур бўлганда уларнинг никоҳлари қайд этилмагани маълум бўлади. 2012 йилда Гуленай ва Тарик ниҳоят Истанбулга кўчиб ўтади, орадан бир йил ўтиб, яъни учрашганларидан роппа-роса 25 йил ўтгач эса расмий равишда никоҳдан ўтишади.

Аммо кўп ўтмай Тарикка ўпка саратони ташхиси қўйилади. Актёр 2019 йилда вафот этгач, Гуленай Калканга айрилиқда яшаш жуда қийин бўлди. ОАВда ёзилишича, актриса никоҳ узугини кўрсатиб, уни ҳеч қачон ечмаслигини айтган.

Кинодаги ижодий фаолияти Каленга яна ҳаётга қайтишида ёрдам берди. Актриса «Мендирман Жалолиддин» тарихий драмасининг биринчи мавсумида Жалолиддиннинг бувиси Туркон хотун ролини ижро этди. Актриса сериаллардан бўлаётган таклифларни рад этмоқчи эмас. Унинг айтишича, актрисани бошқа машҳур турк телелойиҳаларида ҳам учратиб қолиш мумкин.