Buyuk Britaniya Mudofaa vaziri Ben Uolles mamlakat qurolli kuchlarini modernizatsiya qilish strategiyasini taqdim etdi va unda Rossiyadan kelib chiqadigan tahdidni ham qayd etib o‘tdi. Bu haqda Meduza xabar berdi.
“Rossiya Yevropa xavfsizligi uchun eng katta yadroviy, harbiy va gibrid tahdid bo‘lib qolmoqda. Rossiya qurolli kuchlarining modernizatsiyasi, boshqa davlatlar ishiga aralashish qobiliyati va xavf-xatarga bo‘lgan moyilligi Rossiyani mohir va oldindan aytib bo‘lmaydigan o‘yinchiga aylantiradi”, — deyiladi hujjatda.
Strategiyada Rossiyaning dengiz osti jangovar flotiga hamda quyi aloqa kabellariga zarar yetkazishi mumkin bo‘lgan chuqur dengiz uskunalariga, shuningdek, dushman qirg‘oqlariga yadroviy kallakni yetkazib berishga qodir bo‘lgan torpedalar qurishga sarmoya kiritayotgani eslatib o‘tilgan.
Shuningdek, Buyuk Britaniya Mudofaa vazirligi Rossiya uzoq masofada aniq zarbalar bera oladi, deb hisoblaydi, bu esa Buyuk Britaniya va uning ittifoqchilarini “havo mudofaasining yaxlit tizimi yordamida erkin harakatlanishdan” mahrum qiladi. Bu bilan Rossiya Buyuk Britaniyaning “Yevropa, Sharqiy O‘rta Yer dengizi va Yaqin Sharqda kuchini saqlab qolish va manfaatlarini himoya qilish” imkoniyatiga tahdid solmoqda.
Shuningdek, Buyuk Britaniya rasmiylari Rossiyaning kimyoviy yoki biologik qurollaridan Buyuk Britaniya hududida qo‘llashga tayyorligidan xavotirda.
Qurolli kuchlarni modernizatsiya qilish doirasida Buyuk Britaniya Arktikada va Bolqonda, shuningdek, Boltiq, O‘rta Yer dengizi va Qora dengizlarda faolligini oshirishni rejalashtirmoqda.
“Biz Qora dengiz mintaqasida, Uzoq Shimolda, Boltiqbo‘yi va G‘arbiy Bolqonda o‘z ishtirokimizni kengaytiramiz. Mazkur hududlarda biz ittifoqdosh qo‘shinlarni tayyorlash bo‘yicha yangi mintaqaviy tashabbusni amalga oshirmoqdamiz. Faollik ko‘p manfaatli guruhlar doirasida quriladi”, — deyiladi hujjatda.
Qayd etilishicha, Buyuk Britaniya ushbu mintaqalarda yanada faol harakat qilishni maqsad qilgan. Shu munosabat bilan, Qora dengizda “navigatsiya erkinligi va xavfsizligini” ta’minlashda Bolgariya, Gretsiya, Ruminiya, Turkiya va Ukraina bilan hamkorlik kuchaytiriladi.
“Suv osti mudofaasi fregatlarining yangi avlodiga katta sarmoyalar kiritish va ittifoqdosh kuchlar, jumladan, AQSh, Fransiya, Norvegiya va Niderlandiya bilan o‘zaro hamkorlikning yaxshilanishi Buyuk Britaniyaning tarixiy rolini saqlab qolishni kafolatlaydi”, — deyiladi bayonotda.
Avvalroq Buyuk Britaniya Rossiyani milliy xavfsizlikka asosiy tahdid deb atagani haqida xabar berilgandi. Bu Rossiyaning Buyuk Britaniya suv va havo hududiga qarshi “tez-tez tajovuzkor hujumlari” hamda Moskvaning “Britaniya tuprog‘ida o‘z raqiblarini o‘ldirishga” tayyorligi bilan bog‘liq.
Izoh (0)