Буюк Британия Мудофаа вазири Бен Уоллес мамлакат қуролли кучларини модернизация қилиш стратегиясини тақдим этди ва унда Россиядан келиб чиқадиган таҳдидни ҳам қайд этиб ўтди. Бу ҳақда Meduza хабар берди.
«Россия Европа хавфсизлиги учун энг катта ядровий, ҳарбий ва гибрид таҳдид бўлиб қолмоқда. Россия қуролли кучларининг модернизацияси, бошқа давлатлар ишига аралашиш қобилияти ва хавф-хатарга бўлган мойиллиги Россияни моҳир ва олдиндан айтиб бўлмайдиган ўйинчига айлантиради», — дейилади ҳужжатда.
Стратегияда Россиянинг денгиз ости жанговар флотига ҳамда қуйи алоқа кабелларига зарар етказиши мумкин бўлган чуқур денгиз ускуналарига, шунингдек, душман қирғоқларига ядровий каллакни етказиб беришга қодир бўлган торпедалар қуришга сармоя киритаётгани эслатиб ўтилган.
Шунингдек, Буюк Британия Мудофаа вазирлиги Россия узоқ масофада аниқ зарбалар бера олади, деб ҳисоблайди, бу эса Буюк Британия ва унинг иттифоқчиларини «ҳаво мудофаасининг яхлит тизими ёрдамида эркин ҳаракатланишдан» маҳрум қилади. Бу билан Россия Буюк Британиянинг «Европа, Шарқий Ўрта Ер денгизи ва Яқин Шарқда кучини сақлаб қолиш ва манфаатларини ҳимоя қилиш» имкониятига таҳдид солмоқда.
Шунингдек, Буюк Британия расмийлари Россиянинг кимёвий ёки биологик қуролларидан Буюк Британия ҳудудида қўллашга тайёрлигидан хавотирда.
Қуролли кучларни модернизация қилиш доирасида Буюк Британия Арктикада ва Болқонда, шунингдек, Болтиқ, Ўрта Ер денгизи ва Қора денгизларда фаоллигини оширишни режалаштирмоқда.
«Биз Қора денгиз минтақасида, Узоқ Шимолда, Болтиқбўйи ва Ғарбий Болқонда ўз иштирокимизни кенгайтирамиз. Мазкур ҳудудларда биз иттифоқдош қўшинларни тайёрлаш бўйича янги минтақавий ташаббусни амалга оширмоқдамиз. Фаоллик кўп манфаатли гуруҳлар доирасида қурилади», — дейилади ҳужжатда.
Қайд этилишича, Буюк Британия ушбу минтақаларда янада фаол ҳаракат қилишни мақсад қилган. Шу муносабат билан, Қора денгизда «навигация эркинлиги ва хавфсизлигини» таъминлашда Болгария, Греция, Руминия, Туркия ва Украина билан ҳамкорлик кучайтирилади.
«Сув ости мудофааси фрегатларининг янги авлодига катта сармоялар киритиш ва иттифоқдош кучлар, жумладан, АҚШ, Франция, Норвегия ва Нидерландия билан ўзаро ҳамкорликнинг яхшиланиши Буюк Британиянинг тарихий ролини сақлаб қолишни кафолатлайди», — дейилади баёнотда.
Аввалроқ Буюк Британия Россияни миллий хавфсизликка асосий таҳдид деб атагани ҳақида хабар берилганди. Бу Россиянинг Буюк Британия сув ва ҳаво ҳудудига қарши «тез-тез тажовузкор ҳужумлари» ҳамда Москванинг «Британия тупроғида ўз рақибларини ўлдиришга» тайёрлиги билан боғлиқ.
Изоҳ (0)