Selena Gomes, Megan Markl: kinoni tark etganidan keyin mashhurlikka erishgan yulduzlar

Kinoda faoliyatini boshlagan, ammo turli sabablarga ko‘ra boshqa sohani tanlagan mashhurlar haqida ma’lumot beramiz.

Selena Gomes

Ilk bor ekranlarda “Barni va uning do‘stlari” televizion shousida chiqish qilgan Selena “Veyverli Pleyslik sehrgarlar” serialidagi Aleks Russo rolidan keyin o‘smirlar orasida tanilgan, lekin u haqiqiy mashhurlikka aynan musiqiy karyerasi ketidan erishgan. 28 yashar xonanda faoliyati davomida 50 dan ortiq mukofotlarni qo‘lga kiritgan.

Teylor Momsen

3 yoshidan ekranlarda ko‘rinish bergan Teylor 12 yil davomida suratga tushgan. 2011-yilda u aktrisalik faoliyatiga nuqta qo‘ygan va rok guruhiga asos solgan. “The pretty reckless” guruhi bir necha marta chartlarda yetakchilik qilgan.

Kayli Minoug

“Qo‘shnilar” nomli operali serialda suratga tushgani Kaylining xonandalik karyerasining boshlanishiga sababchi bo‘lgan. 1986-yilda aktrisa xayriya konsertida qo‘shiq kuylagani musiqiy prodyuserlar e’tiborini tortgan. Ushbu qadam uning musiqa olamida mashhurlikka erishishiga sabab bo‘lgan. U bir necha marta chartlarda yetakchilik qilgan va muxlislar qalbidan joy olishga ulgurgan.

Jared Leto

Aktyor bo‘lish uchun 1992-yilda Los-Anjelesga kelgan Jared mahorati sabab bir qancha nufuzli mukofotlar, xususan, “Oskar” va “Oltin globus”ni ham qo‘lga kiritishga muvaffaq bo‘lgan.  Shunga qaramay, u bugungi kunda musiqa bilan shug‘ullanadi. Akasi bilan birgalikda asos solgan “30 Seconds to Mars” rok guruhi butun dunyoda o‘z muxlislariga ega bo‘lgan.

Mayli Sayrus

Ilk bor Tim Bertonning “Yirik baliq” filmida suratga tushgan Mayli keyinroq “Xanna Montana” serialida rol ijro qilgan va unga saundtrek kuylagan. Musiqa olamidagi faoliyatini 2007-yilda boshlagan va ko‘plab muvaffaqiyatlarni qo‘lga kiritgan.

Adam Lambert

10 yoshidan teatrda rol ijro qilgan Adam o‘sha paytlardanoq musiqa bilan shug‘ullanib yurgan. Ammo haqiqiy mashhurlikka “American Idol”dagi ishtirokidan keyin erishgan. U nafaqat muxlislar qalbidan joy olgan, balki “Queen” guruhi a’zolarining e’tirofiga sazovor bo‘lgan.

Kemeron Dias

“Niqob” filmidan keyin mashhurlikka erishgan aktrisaga rejissorlardan turli takliflar kelib tusha boshlagan. 1990-yillar oxiri hamda 2000- yillarning boshida yetarlicha mashhurlikka erishgan Diasning keyingi ijrolari ko‘plab tanqidlarga sabab bo‘lgan. Shu va oilasi bilan bog‘liq boshqa sabablar bois aktrisalik faoliyatiga nuqta qo‘ygan Kemeron karyerasini boshlaganidan 27 yil o‘tib, “The Body book” nomli kitob yozgan. Kitob The New York Times’ning bestsellerlari ro‘yxatidan o‘rin olgan.

Megan Markl

“Asosiy gospital” serialida ilk bor suratga tushgan Megan “Fors-major” loyihasidan keyin mashhurlikka erishgan. Markl aktrisalik faoliyatiga nuqta qo‘ygunicha 7 yil davomida kinosanoatda faoliyat yuritgan. Shahzoda Garri bilan 2018-yilning 19-mayida turmush qurgan malika oradan 2 yil o‘tib farzandli bo‘lgan.

Meri-Keyt va Eshli Olsen

“Egizaklar: men va mening soyam” filmidagi roli bilan mashhurlikka erishgan opa-singillar 8 yil davomida suratga tushgan. Bir qancha mukofot va e’tiroflarga loyiq deb topilgan aktrisalar 2004-yilda biznes bilan shug‘ullanish sabab faoliyatiga nuqta qo‘ygan. O‘zining shaxsiy brendiga asos solgan Meri-Keyt va Eshli o‘smirlar va mashhurlar uchun kiyimlar ishlab chiqara boshlagan hamda ikki karra Amerikaning “Eng yaxshi dizayneri” deb topilgan.

Kventin Tarantino

Kventin maktabni bitirganidan keyin aktyor bo‘lishga qaror qilgan. Kurslarga qatnashgan Tarantino e’tibor jalb qilish uchun rezyumelarida o‘zini “Qirol sher”da suratga tushgan deb ko‘rsatgan. Shunga qaramay, aktyorlik bobida uning omadi chopmagan. Ikki marta Elvis Preslining qiyofadoshi rolini ijro qilgan Tarantino keyinchalik o‘zi film suratga olish bilan shug‘ullana boshlagan. Aktyor Xardi Keytel uning ilk filmini moliyalashtirishga yordam bergan. Bugungi kunda Tarantino Gollivudning eng yaxshi rejissorlaridan biri hisoblanadi.

Ledi Gaga

Asl ismi Stefani bo‘lgan xonanda maktab teatrida rol ijro qilgan. U pyesalarda bosh qahramonni gavdalantirgan, hamda aktyorlik mahoratidan dars olgan. “Klan Soprano” serialida epizodik rolni o‘ynagan aktrisaning omadi keyinchalik bu sohada unchalik chopmagan. Shundan keyin xonanda bo‘lish uchun kollejni tark etgan. Nyu-York klublarida qo‘shiqlari yangragan qiz 2008-yilda birinchi shartnomani imzolagan hamda qo‘shiq yozgan va kuylagan. Iste’dodi sabab mashhurlikka erishgan xonandaga keyinchalik filmlardan ham takliflar kelib tusha boshlagan.