Селена Гомес, Меган Маркл: кинони тарк этганидан кейин машҳурликка эришган юлдузлар

Кинода фаолиятини бошлаган, аммо турли сабабларга кўра бошқа соҳани танлаган машҳурлар ҳақида маълумот берамиз.

Селена Гомес

Илк бор экранларда «Барни ва унинг дўстлари» телевизион шоусида чиқиш қилган Селена «Вейверли Плейслик сеҳргарлар» сериалидаги Алекс Руссо ролидан кейин ўсмирлар орасида танилган, лекин у ҳақиқий машҳурликка айнан мусиқий карьераси кетидан эришган. 28 яшар хонанда фаолияти давомида 50 дан ортиқ мукофотларни қўлга киритган.

Тэйлор Момсен

3 ёшидан экранларда кўриниш берган Тэйлор 12 йил давомида суратга тушган. 2011 йилда у актрисалик фаолиятига нуқта қўйган ва рок гуруҳига асос солган. «The pretty reckless» гуруҳи бир неча марта чартларда етакчилик қилган.

Кайли Миноуг

«Қўшнилар» номли операли сериалда суратга тушгани Кайлининг хонандалик карьерасининг бошланишига сабабчи бўлган. 1986 йилда актриса хайрия концертида қўшиқ куйлагани мусиқий продюсерлар эътиборини тортган. Ушбу қадам унинг мусиқа оламида машҳурликка эришишига сабаб бўлган. У бир неча марта чартларда етакчилик қилган ва мухлислар қалбидан жой олишга улгурган.

Жаред Лето

Актёр бўлиш учун 1992 йилда Лос-Анжелесга келган Жаред маҳорати сабаб бир қанча нуфузли мукофотлар, хусусан, «Оскар» ва «Олтин глобус»ни ҳам қўлга киритишга муваффақ бўлган.  Шунга қарамай, у бугунги кунда мусиқа билан шуғулланади. Акаси билан биргаликда асос солган «30 Seconds to Mars» рок гуруҳи бутун дунёда ўз мухлисларига эга бўлган.

Майли Сайрус

Илк бор Тим Бертоннинг «Йирик балиқ» фильмида суратга тушган Майли кейинроқ «Ханна Монтана» сериалида рол ижро қилган ва унга саундтрек куйлаган. Мусиқа оламидаги фаолиятини 2007 йилда бошлаган ва кўплаб муваффақиятларни қўлга киритган.

Адам Ламберт

10 ёшидан театрда рол ижро қилган Адам ўша пайтларданоқ мусиқа билан шуғулланиб юрган. Аммо ҳақиқий машҳурликка «American Idol»даги иштирокидан кейин эришган. У нафақат мухлислар қалбидан жой олган, балки «Queen» гуруҳи аъзоларининг эътирофига сазовор бўлган.

Кемерон Диас

«Ниқоб» фильмидан кейин машҳурликка эришган актрисага режиссёрлардан турли таклифлар келиб туша бошлаган. 1990 йиллар охири ҳамда 2000- йилларнинг бошида етарлича машҳурликка эришган Диаснинг кейинги ижролари кўплаб танқидларга сабаб бўлган. Шу ва оиласи билан боғлиқ бошқа сабаблар боис актрисалик фаолиятига нуқта қўйган Кемерон карьерасини бошлаганидан 27 йил ўтиб, «The Body book» номли китоб ёзган. Китоб The New York Times’нинг бесцеллерлари рўйхатидан ўрин олган.

Меган Маркл

«Асосий госпитал» сериалида илк бор суратга тушган Меган «Форс-мажор» лойиҳасидан кейин машҳурликка эришган. Маркл актрисалик фаолиятига нуқта қўйгунича 7 йил давомида киносаноатда фаолият юритган. Шаҳзода Гарри билан 2018 йилнинг 19 майида турмуш қурган малика орадан 2 йил ўтиб фарзандли бўлган.

Мери-Кейт ва Эшли Ольсен

«Эгизаклар: мен ва менинг соям» фильмидаги роли билан машҳурликка эришган опа-сингиллар 8 йил давомида суратга тушган. Бир қанча мукофот ва эътирофларга лойиқ деб топилган актрисалар 2004 йилда бизнес билан шуғулланиш сабаб фаолиятига нуқта қўйган. Ўзининг шахсий брендига асос солган Мери-Кейт ва Эшли ўсмирлар ва машҳурлар учун кийимлар ишлаб чиқара бошлаган ҳамда икки карра Американинг «Энг яхши дизайнери» деб топилган.

Квентин Тарантино

Квентин мактабни битирганидан кейин актёр бўлишга қарор қилган. Курсларга қатнашган Тарантино эътибор жалб қилиш учун резюмеларида ўзини «Қирол шер»да суратга тушган деб кўрсатган. Шунга қарамай, актёрлик бобида унинг омади чопмаган. Икки марта Элвис Преслининг қиёфадоши ролини ижро қилган Тарантино кейинчалик ўзи фильм суратга олиш билан шуғуллана бошлаган. Актёр Харди Кейтел унинг илк фильмини молиялаштиришга ёрдам берган. Бугунги кунда Тарантино Голливуднинг энг яхши режиссёрларидан бири ҳисобланади.

Леди Гага

Асл исми Стефани бўлган хонанда мактаб театрида рол ижро қилган. У песаларда бош қаҳрамонни гавдалантирган, ҳамда актёрлик маҳоратидан дарс олган. «Клан Сопрано» сериалида эпизодик ролни ўйнаган актрисанинг омади кейинчалик бу соҳада унчалик чопмаган. Шундан кейин хонанда бўлиш учун коллежни тарк этган. Нью-Йорк клубларида қўшиқлари янграган қиз 2008 йилда биринчи шартномани имзолаган ҳамда қўшиқ ёзган ва куйлаган. Истеъдоди сабаб машҳурликка эришган хонандага кейинчалик фильмлардан ҳам таклифлар келиб туша бошлаган.