Gruziya prezidenti koronavirusga qarshi AstraZeneca vaksinasi bilan emlandi

Gruziya prezidenti Salome Zurabishvili 18-mart kuni Tbilisi yuqumli kasalliklar shifoxonasida AstraZeneca vaksinasi bilan koronavirusga qarshi emlandi. Bu haqda “Interfaks” xabar berdi.

“Men navbatdan tashqari emlandim, chunki bu bosqichda tibbiyot xodimlari emlanmoqda, lekin bu bilan men aholiga namuna bo‘lishni istadim. Pandemiyani yengib o‘tish uchun barcha emlanishi kerak. Biz bu va boshqa qiyinchiliklarni yengib o‘tishimizga ishonaman”, — dedi Zurabishvili.

13-mart kuni Gruziya bosh vaziri Irakliy Garibashvili birinchi 43,2 ming dozali AstraZeneca vaksinasi qabul qilingani va tibbiyot xodimlarini emlashni boshlash haqida xabar bergan edi.

Uning ma’lumotlariga ko‘ra, vaksina ishlab chiqaruvchi boshqa kompaniyalar bilan ham muzokaralar olib borilmoqda. “Yaqin kunlarda vaksinaning navbatdagi dozalari qabul qilinishi bilan aholining turli qatlamlarini emlash ishlari boshlanadi”, — dedi bosh vazir.

Mamlakat Sog‘liqni saqlash vazirligi ma’lumotlariga ko‘ra, o‘tgan bir necha kun davomida mamlakatda 369 ta koronavirus bilan kasallanish holati qayd etildi. Pandemiya boshidan buyon esa jami 276 436 ta holat ro‘yxatga olingan.

Avvalroq Tailand bosh vaziri Prayut Chan-Ocha AstraZeneca vaksinasining birinchi dozasini qabul qildi. U mamlakatda xavfsizlik nuqtayi nazaridan preparatni qo‘llash to‘xtatilganidan keyin ushbu dori bilan emlangan birinchi odam bo‘ldi.

Shuningdek, Yaponiya bosh vaziri Yosixide Suga Pfizer kompaniyasining vaksinasi bilan emlandi. U koronavirusga qarshi jamoatchilik oldida emlangan birinchi yapon amaldori bo‘ldi. Vaksinatsiya vazirning AQSh prezidenti Jo Bayden bilan aprel oyiga rejalashtirilgan uchrashuvi oldidan amalga oshirildi.

Ukraina prezidenti Vladimir Zelenskiy esa koronavirusga qarshi Hindistonda ishlab chiqarilgan vaksina bilan emlandi. Zelenskiyni emlash uchun Hindistondagi zavodda AstraZeneca tomonidan ishlab chiqarilgan Covishield vaksinasidan foydalanildi. Prezidentning so‘zlariga ko‘ra, u vaksinani “askarlar bilan old qatorda turadigan bosh qo‘mondon singari birinchilardan bo‘lib” qabul qildi.