Tataristonning Zainsk shahrida shaxsi oshkor qilinmagan uch o‘g‘il va bir qiz “Ozodlik jangchisi” yodgorligini yoqib yuborganlikda gumon qilinmoqda. Bu haqda Tatariston Tergov qo‘mitasining viloyat boshqarmasiga tayanib, Meduza xabar berdi.
Tergov ma’lumotlariga ko‘ra, 16-mart kuni kechqurun bolalar yodgorlik yonidagi mangu olovda archa shoxlarini yoqqan, shundan so‘ng ular yaqin atrofdagi gulchambarni yoqishgan va yong‘in yodgorlikka tutashib ketgan. Baza “Ozodlik jangchisi”ning oyog‘idagi obyektni yoqmoqchi bo‘lgan to‘rtta bolani aks ettirgan videoni e’lon qildi.
Tatariston Favqulodda vaziyatlar vazirligi 16-mart kuni kechqurun soat 18:39 da (Toshkent vaqti bilan 20: 39 ) yong‘in haqida signal olganini va 11 daqiqadan so‘ng ular 6 kvadrat metr maydondagi ochiq yong‘inni butunlay bartaraf qilishganini xabar qilgan.
Yong‘in natijasida qorishma materiallardan yasalgan olti metrlik yodgorlik butunlay yonib ketgan. Fotosuratlarga qaralganda, o‘t o‘chirilgandan so‘ng yodgorlikdan, faqat ramka qolgan, ammo Tergov qo‘mitasining voqea joyidan olgan videosiga ko‘ra, ertalabgacha u ham qoldirilmagan.
Tatariston politsiyasining ma’lum qilishicha, yodgorlikka o‘t qo‘yganlikda gumon qilingan bolalarning shaxsi aniqlangan. Ichki ishlar vazirligi ularni 2010—2012-yillarda tug‘ilgan uch nafar qiz va bir o‘g‘il (Tergov qo‘mitasida aytilganidek, uch o‘g‘il va bir qiz emas) deb da’vo qilmoqda.
Politsiya bolalarni tarbiyalash bo‘yicha majburiyatlarni bajarmaganlik to‘g‘risidagi moddaga binoan, ularning ota-onalariga qarshi ma’muriy bayonnomalar tuzdi. Shuningdek, politsiya voyaga yetmaganlar ishlari bo‘yicha komissiya uchun materiallar tayyorlamoqda.
“Ozodlik jangchisi” yodgorligi 2020-yil may oyida Ulug‘ Vatan urushidagi g‘alabaning 75 yilligini nishonlash uchun o‘rnatilgan edi. Haykal o‘zidan avvalgi tosh yodgorlikni o‘rniga qurilgan. Zainsk munitsipal okrugining veb-saytida “Yangi yodgorlik olovga chidamli material — polimerdan tayyorlangan” deb xabar berilgandi. “RIA Novosti”ning yozishicha, o‘tga chidamli yodgorlikni o‘rnatish uchun 1,65 million rubl (22 388 dollar) sarflangan.
Yodgorlik muallifi, haykaltarosh Yevgeniy Kozlovning OAVga aytishicha, yodgorlik haqiqatan ham olovga chidamli polimerdan tayyorlangan edi, ammo bu material olovdan 100 foiz himoya qilmaydi. “Bu uning umuman yonib ketmasligini anglatmaydi. U yonadi, ammo bu material ochiq olovni bir muncha vaqt o‘ziga olmaydi”, — degan Yevgeniy Kozlov. Haykaltarosh tahririyatga materialning yong‘inga chidamliligini ko‘rsatadigan videoni taqdim etdi. Videoyozuvda polimer yong‘in ta’sirida qorayib, tutagan, ammo yonib ketmagan.
Tergov qo‘mitasi Vatan himoyasida halok bo‘lganlar xotirasini abadiylashtiradigan yodgorliklarni yo‘q qilish moddasi bo‘yicha jinoiy ish qo‘zg‘adi. Tergov jarayonida tergovchilar “yonuvchan materiallardan yodgorlik o‘rnatishga ruxsat bergan” mansabdor shaxslarning harakatlariga baho bermoqchi. Tergov qo‘mitasi rahbari Aleksandr Bastrikin tergov jarayonini shaxsan nazoratiga olgan. Tatariston prokuraturasi, o‘z navbatida, yodgorlikni o‘rnatish bo‘yicha shartnomaning “ishlab chiqarish texnologiyasiga muvofiqligi va talabga javob beradigan olovga chidamli materiallardan foydalanish nuqtayi nazaridan” tekshirilishini aytgan.
Avvalroq Sankt-Peterburgda koronavirusdan vafot etgan shifokorlarga atab yodgorlik ochilgani haqida xabar berilgandi. Ochilish marosimi yodgorlik tashabbuskorlarisiz, maxfiy tarzda o‘tkazilgan.
Izoh (0)