Грузия президенти Саломе Зурабишвили 18 март куни Тбилиси юқумли касалликлар шифохонасида AstraZeneca вакцинаси билан коронавирусга қарши эмланди. Бу ҳақда «Интерфакс» хабар берди.
«Мен навбатдан ташқари эмландим, чунки бу босқичда тиббиёт ходимлари эмланмоқда, лекин бу билан мен аҳолига намуна бўлишни истадим. Пандемияни енгиб ўтиш учун барча эмланиши керак. Биз бу ва бошқа қийинчиликларни енгиб ўтишимизга ишонаман», — деди Зурабишвили.
13 март куни Грузия бош вазири Ираклий Гарибашвили биринчи 43,2 минг дозали AstraZeneca вакцинаси қабул қилингани ва тиббиёт ходимларини эмлашни бошлаш ҳақида хабар берган эди.
Унинг маълумотларига кўра, вакцина ишлаб чиқарувчи бошқа компаниялар билан ҳам музокаралар олиб борилмоқда. «Яқин кунларда вакцинанинг навбатдаги дозалари қабул қилиниши билан аҳолининг турли қатламларини эмлаш ишлари бошланади», — деди бош вазир.
Мамлакат Соғлиқни сақлаш вазирлиги маълумотларига кўра, ўтган бир неча кун давомида мамлакатда 369 та коронавирус билан касалланиш ҳолати қайд этилди. Пандемия бошидан буён эса жами 276 436 та ҳолат рўйхатга олинган.
Аввалроқ Таиланд бош вазири Прают Чан-Оча AstraZeneca вакцинасининг биринчи дозасини қабул қилди. У мамлакатда хавфсизлик нуқтаи назаридан препаратни қўллаш тўхтатилганидан кейин ушбу дори билан эмланган биринчи одам бўлди.
Шунингдек, Япония бош вазири Ёсихидэ Суга Pfizer компаниясининг вакцинаси билан эмланди. У коронавирусга қарши жамоатчилик олдида эмланган биринчи япон амалдори бўлди. Вакцинация вазирнинг АҚШ президенти Жо Байден билан апрель ойига режалаштирилган учрашуви олдидан амалга оширилди.
Украина президенти Владимир Зеленский эса коронавирусга қарши Ҳиндистонда ишлаб чиқарилган вакцина билан эмланди. Зеленскийни эмлаш учун Ҳиндистондаги заводда AstraZeneca томонидан ишлаб чиқарилган Covishield вакцинасидан фойдаланилди. Президентнинг сўзларига кўра, у вакцинани «аскарлар билан олд қаторда турадиган бош қўмондон сингари биринчилардан бўлиб» қабул қилди.
Изоҳ (0)