Respublikada faoliyat yurituvchi 206 nafar hokimning matbuot kotiblari Prezident akademiyasida malaka oshiradi

Respublikada faoliyat yurituvchi mavjud 206 nafar viloyat, shahar va tuman hokimlarining matbuot kotiblari O‘zbekiston Prezidenti huzuridagi Davlat boshqaruvi akademiyasida malaka oshirishni boshladi, deya xabar berdi “Daryo” muxbiri.

Ma’lum bo‘lishicha, mazkur o‘quv kursi Prezident administratsiyasi rahbari o‘rinbosari vazifasini bajaruvchi Dilnoza Ziyomuhammedova tashabbusi bilan tashkil etilgan.

Ta’kidlanishicha, hokimlarning axborot siyosati masalalari bo‘yicha maslahatchilari bugun, 9-mart kuni prezident akademiyasida birinchi mashg‘ulotlarni o‘tamoqda.

“Birinchi mashg‘ulotni olib borgan prezident maslahatchisining birinchi o‘rinbosari Qahramon Quronboyev hokimliklarda axborot xizmati tashkil etilishidan ko‘zlangan maqsad va matbuot kotiblarining vazifalari haqida so‘z yuritdi. Va oldimizga qo‘yilgan maqsadga erishishda biz — matbuot kotiblarining rolimiz naqadar ahamiyatli ekanligini yana bir karra tushuntirib berdi. O‘ylaymanki, mazkur malaka oshirish kurslari bizning kelgusidagi faoliyatimizda katta ahamiyat kasb etadi”, — deydi Qashqadaryo viloyati hokimligi axborot xizmati rahbari Ahror Sodiqov.

Qo‘shimcha qilinishicha, mazkur malaka oshirish kurslarida jurnalist va blogerlar, shuningdek, respublikadagi davlat tashkilotlarining eng faol matbuot kotiblari ham ishtirok etib, ularga o‘z tavsiyalarini beradi.

Eslatib o‘tamiz, Prezident Administratsiyasi huzuridagi Axborot va ommaviy kommunikatsiyalar agentligi direktorining birinchi o‘rinbosari Dilshod Saidjonov “Hududlardagi matbuot kotiblari o‘qitiladi, ammo karantin sabab bu ortga surilmoqda”, degandi.