Toshkent viloyatida o‘zini DXX Toshkent shahar boshqarmasi kadrlar bo‘limi boshlig‘i deb tanishtirib, fuqaroni 5000 dollar evaziga ishga kiritib qo‘yishni va’da qilgan shaxs qo‘lga olindi, deya xabar qilmoqda viloyat IIBB.
Ma’lum qilinishicha, 2021-yilning 3-mart kuni Toshkent viloyatida yashovchi fuqaro X.N. viloyat IIBBga ariza bilan murojaat qiladi. Arizasida o‘zini DXX Toshkent shahar boshqarmasi kadrlar bo‘limi boshlig‘i deb tanishtirgan shaxs o‘g‘lini DXX harbiy qismlaridan biriga ishga kiritib qo‘yishi uchun 5000 AQSh dollari talab qilayotganligini ma’lum qilib, qonuniy chora ko‘rishni so‘raydi.
Mazkur arizaga asosan Toshkent viloyati IIBB Korrupsiya va iqtisodiy jinoyatlarga qarshi kurashish va O‘z xavfsizlik boshqarmasi viloyat bo‘limi xodimlari va DXX xodimlari hamkorligida Chirchiq shahrida tezkor tadbir o‘tkaziladi.
Tadbir davomida o‘zini DXX Toshkent shahar boshqarmasi kadrlar bo‘limi boshlig‘i deb tanishtirgan shaxs — E.M. katta leytenant unvonidagi DXXning xizmat kiyimi (formasi)da arizachidan kelishilgan 5000 AQSh dollari miqdoridagi pullarni olayotgan vaqtda tadbir ishtirokchilari tomonidan ushlangan va tegishli hujjatlar rasmiylashtirilgan.
O‘tkazilgan suhbat davomida ushbu shaxs Surxondaryo viloyatida yashovchi 1998-yilda tug‘ilgan E.M. ekanligi va u hech bir davlat organi yoki boshqa tashkilotda ishlamasligi, shuningdek, avvalroq DXXga qarashli harbiy qismda muddatli harbiy xizmatni o‘taganligi aniqlangan.
Ushlangan shaxsga nisbatan Jinoyat kodeksining tegishli moddalari bilan jinoyat ishi qo‘zg‘atilgan.
Bundan avval Chinozda tadbirkorga 12 800 dollar evaziga 1,3 gektar yer ajratib berishni va’da qilgan tuman hokimligi xodimi ushlangani, Buxoroda fuqaroni ishga joylashtirish evaziga 700 dollar pora talab qilgan katta hamshira qo‘lga olingani hamda Samarqandda OTM rektoriga telefonda tahdid qilgan soxta Korrupsiyaga qarshi kurashish agentligi xodimi aniqlangani haqida xabar berilgandi.
Izoh (0)