Qashqadaryo viloyatining Shahrisabz shahri hokimi Akrom Sulaymonov OAV tanqididan so‘ng 20 ta yangi ish o‘rni yaratmoqchi bo‘lgan tadbirkorga yer berdi. Bu haqda “Daryo”ga shahar hokimligi axborot xizmati rahbari Gulnora Uzoqova xabar berdi.
Hokimlik axborot xizmati rahbarining ma’lumot berishicha, “Daryo”da “‘20 ta yangi ish o‘rni yaratish uchun 8 sotix yer ololmay sarsonman’. Shahrisabzda o‘z mablag‘i evaziga ishsizlarga imkoniyat yaratmoqchi bo‘lgan tadbirkor uch oydan buyon sarson bo‘lmoqda” sarlavhali maqola e’lon qilingach, shahar hokimi va ishchi guruh maqolada tilga olingan holatlarni o‘rgangan.
“2021-yilning 25-fevral kuni Shahrisabz shahar hokimining 2018-yil 25-iyundagi qarori bilan murojaatchi Umida Kurayeva ishtirokida ‘Tutzor’ mahallasi hududidagi aylanma yo‘lning shimolida joylashgan, tadbirkorga ajratilgan yer uchastkasi o‘rnidan 0,06 ga yer maydoni shahar hokimligi mutaxassislari tomonidan o‘lchab berildi. Murojaatchi o‘ziga ajratilgan yer maydonini hech qanday e’tirozlarsiz qabul qilib oldi. Tadbirkor o‘ziga ajratilgan yer maydonida qurilish ishlarini boshlab yuborganini bildirdi”, — dedi Gulnora Uzoqova.
Aniqlik kiritilishicha, tadbirkorga dastlab berilgan va keyinchalik shaharning sobiq hokimi To‘lqin Karimov maslahati bilan voz kechilgan sakkiz sotix yerning olti sotixi tadbirkorga qaytarilgan. Qolgan ikki sotix maydonda esa kam ta’minlangan fuqaro tomonidan barpo etilgan issiqxona o‘z joyida qoldirilgan.
Eslatib o‘tamiz, avvalroq “Daryo”ga murojaat qilgan tadbirkor o‘z mablag‘i hisobidan maishiy xizmat uyi barpo etib, 20 ta yangi ish o‘rni yaratishni niyat qilganini, biroq mazkur obyektni qurish uchun 8 sotix yer ololmay, sarson bo‘layotganini bildirgandi.
Izoh (0)