Қашқадарё вилоятининг Шаҳрисабз шаҳри ҳокими Акром Сулаймонов ОАВ танқидидан сўнг 20 та янги иш ўрни яратмоқчи бўлган тадбиркорга ер берди. Бу ҳақда «Дарё»га шаҳар ҳокимлиги ахборот хизмати раҳбари Гулнора Узоқова хабар берди.
Ҳокимлик ахборот хизмати раҳбарининг маълумот беришича, «Дарё»да «‘20 та янги иш ўрни яратиш учун 8 сотих ер ололмай сарсонман’. Шаҳрисабзда ўз маблағи эвазига ишсизларга имконият яратмоқчи бўлган тадбиркор уч ойдан буён сарсон бўлмоқда» сарлавҳали мақола эълон қилингач, шаҳар ҳокими ва ишчи гуруҳ мақолада тилга олинган ҳолатларни ўрганган.
«2021 йилнинг 25 февраль куни Шаҳрисабз шаҳар ҳокимининг 2018 йил 25 июндаги қарори билан мурожаатчи Умида Кураева иштирокида ‘Тутзор’ маҳалласи ҳудудидаги айланма йўлнинг шимолида жойлашган, тадбиркорга ажратилган ер участкаси ўрнидан 0,06 га ер майдони шаҳар ҳокимлиги мутахассислари томонидан ўлчаб берилди. Мурожаатчи ўзига ажратилган ер майдонини ҳеч қандай эътирозларсиз қабул қилиб олди. Тадбиркор ўзига ажратилган ер майдонида қурилиш ишларини бошлаб юборганини билдирди», — деди Гулнора Узоқова.
Аниқлик киритилишича, тадбиркорга дастлаб берилган ва кейинчалик шаҳарнинг собиқ ҳокими Тўлқин Каримов маслаҳати билан воз кечилган саккиз сотих ернинг олти сотихи тадбиркорга қайтарилган. Қолган икки сотих майдонда эса кам таъминланган фуқаро томонидан барпо этилган иссиқхона ўз жойида қолдирилган.
Эслатиб ўтамиз, аввалроқ «Дарё»га мурожаат қилган тадбиркор ўз маблағи ҳисобидан маиший хизмат уйи барпо этиб, 20 та янги иш ўрни яратишни ният қилганини, бироқ мазкур объектни қуриш учун 8 сотих ер ололмай, сарсон бўлаётганини билдирганди.
Изоҳ (0)