KXDR yetakchisi Kim Chen In mamlakatning iqtisodiy ko‘rsatkichlaridagi pasayishlarda hukumatning faoliyatini tanqid qildi. Bu haqda “Kommersant.ru” xabar berdi.

Foto: Reuters

Iqtisodiyotdagi muammolar haqida mamlakat rahbari avval ham gapirgan edi.

“Vazirlar Mahkamasi muhim iqtisodiy yo'nalish rejalarini tuzishda yetakchilik qila olmadi va vazirliklar tomonidan tayyorlangan hisobotlarni mexanik ravishda birlashtirish bilan cheklandi”, — dedi KXDR rahbari.

Shuningdek, Kim Chen In Mehnat partiyasi Markaziy qo‘mitasining iqtisodiy departamenti rahbari Kim Tu Irni vazifasidan ozod qildi.

2021-yil yanvarida bo‘lib o‘tgan Koreya Mehnat partiyasining sakkizinchi yig‘inida KXDR yetakchisi iqtisodiyotning deyarli barcha sohalarida ko‘rsatkichlar rejadan sezilarli darajada past bo‘lganini aytdi. Shu munosabat bilan davlat rahbari mamlakatda liberal iqtisodiyotni Xitoy modeli asosida rivojlantirish va tashqi bozorlarni egallash g‘oyasi rad etilganini e’lon qildi. Endi KXDR davlatning iqtisodiyotdagi tartibga soluvchi rolini kuchaytirib, ichki iste’molga e’tibor qaratadi.