Tesla Model 3 elektromobilining egasi YouTube orqali shu haftada o‘zi bilan sodir bo‘lgan kulgili voqea tasvirlangan videorolik bilan bo‘lishdi.
Mashina egasi avtomobilning o‘zini oldiga kelishiga imkon beradigan Smart Summon funksiyasidan foydalangan, biroq haydovchisiz avtomobil avtoturargohdagi bir ayolning e’tiborini tortgan va u mashina ortidan quvib, uni to‘xtatishga uringan.
“Pensilvaniya shtatidagi Uest-Chester shahrida joylashgan restorandan chiqib, Tesla Model 3’imni chaqirdim. Ayol avtomobilim haydovchisiz harakatlanayotganini ko‘rib qolgan. U mashina shunchaki yurib ketyapti deb o‘ylagan. U mashinaga yugurib kelib, oldidan uni to‘xtatishni boshlagan. Sodir bo‘layotgan voqeani ko‘rgach, men Tesla’ni to‘xtatdim. Tabiiyki, ayol juda xijolat bo‘ldi. Ayol tomonidan ehtimoliy avariyani oldini olishga qilingan harakat juda yoqimli bo‘lishi bilan birga, qiziqarli ham edi”, — deb yozadi mashina egas.
Video Model 3 kuzoviga o‘rnatilgan kameralardan biri yordamida tasvirga olingan. Sentry Mode rejimida kameralar potensial buzg‘unchilik va boshqa ko‘ngilsiz hodisalarni qayd etish imkonini beradi. Ushbu funksiya Tesla egalariga qarshi yo‘naltirilgan avtomobil vandalizmi to‘lqiniga javob bo‘lgan.
Smart Summon funksiyasi ancha yangi hisoblanadi, u Tesla’ga 2019-yilning sentabrida o‘rnatilgan. Shu sababli uning ishini hatto kompaniyaning elektromobillari ommalashgan davlatlardagi ko‘pchilik fuqarolar ko‘rmagan. Funksiya 60 metrgacha uzoqlikda bo‘lgan avtomobilni chaqirish imkonini beradi.
Avvalroq Tesla Model 3 kameralari yonida turgan Porsche’ning o‘g‘irlanishini videoga olgani to‘g‘risida xabar berilgandi.
Izoh (0)