Tesla Моdel 3 электромобилининг эгаси YouTube орқали шу ҳафтада ўзи билан содир бўлган кулгили воқеа тасвирланган видеоролик билан бўлишди.
Машина эгаси автомобилнинг ўзини олдига келишига имкон берадиган Smart Summon функциясидан фойдаланган, бироқ ҳайдовчисиз автомобиль автотураргоҳдаги бир аёлнинг эътиборини тортган ва у машина ортидан қувиб, уни тўхтатишга уринган.
«Пенсильвания штатидаги Уэст-Честер шаҳрида жойлашган ресторандан чиқиб, Tesla Моdel 3’имни чақирдим. Аёл автомобилим ҳайдовчисиз ҳаракатланаётганини кўриб қолган. У машина шунчаки юриб кетяпти деб ўйлаган. У машинага югуриб келиб, олдидан уни тўхтатишни бошлаган. Содир бўлаётган воқеани кўргач, мен Tesla’ни тўхтатдим. Табиийки, аёл жуда хижолат бўлди. Аёл томонидан эҳтимолий аварияни олдини олишга қилинган ҳаракат жуда ёқимли бўлиши билан бирга, қизиқарли ҳам эди», — деб ёзади машина эгас.
Видео Моdel 3 кузовига ўрнатилган камералардан бири ёрдамида тасвирга олинган. Sentry Mode режимида камералар потенциал бузғунчилик ва бошқа кўнгилсиз ҳодисаларни қайд этиш имконини беради. Ушбу функция Tesla эгаларига қарши йўналтирилган автомобиль вандализми тўлқинига жавоб бўлган.
Smart Summon функцияси анча янги ҳисобланади, у Tesla’га 2019 йилнинг сентябрида ўрнатилган. Шу сабабли унинг ишини ҳатто компаниянинг электромобиллари оммалашган давлатлардаги кўпчилик фуқаролар кўрмаган. Функция 60 метргача узоқликда бўлган автомобилни чақириш имконини беради.
Аввалроқ Tesla Моdel 3 камералари ёнида турган Porsche’нинг ўғирланишини видеога олгани тўғрисида хабар берилганди.
Изоҳ (0)