Dunyo bo‘ylab minglab odamlar Kembrij universitetining Botanika bog‘ida ochilgan selenitsereus gulini tomosha qildi, u faqat bir kecha yashaydi, xolos, deb yozadi BBC.
Botanika bog‘bonlarining aytishicha, vatani minglab kilometr uzoqlikda bo‘lgan kaktus Britaniyada ilk marta gul ochgan. Selenitsereus – “oy kaktusi” yoki “tun malikasi” deb nomlanib, daraxtlar atrofida o‘sadigan uzun bo‘yli hamda tekis poyali kaktusdir. Tojga o‘xshash o‘tkir oq bargli gul odatda tunda gullab, atrofga kuchli hid taratadi. U atigi 12 soat davomida gullaydi va shundan so‘ng uning hidi o‘zgarib, guli quriydi. Angliyada “tun malikasi”ning ochilishini dunyo bo‘ylab minglab odamlar tomosha qildi.
Kembrij universitetidagi issiqxona rahbari Aleks Sammers ham boshqalar qatori gulning ochilishini tomosha qilgan va buni aqlbovar qilmas voqea deb atagan. “Ushbu g‘ayrioddiy gullarni ko‘rganimdan juda xursandman. Bu kabi o‘simlik bizning kolleksiyamizda kam uchraydi. Bilishimcha, ‘tun malikasi’ Britaniyada birinchi marta gulladi”, − deya ma’lum qilgan Sammers Botanika bog‘i saytida.
Kaktus noyabr oyida kurtak yoza boshlagan, ammo 2021-yilning 19-fevral kuni gullagan. O‘simlik yonidagi maxsus kamera so‘nggi 11 kun ichida kurtakning holatini qayd etgan.
Kaktus yaqinida bo‘lgan issiqxona xodimlari uning o‘ziga xos hididan bahramand bo‘lgan. To‘g‘ri, bu uzoq davom etmagan. Dastlab uning hidi juda xushbo‘y bo‘lgan, ammo tongda ifor keskin o‘zgarib ketgan.
Selenitsereus − kaktuslar oilasiga mansub bo‘lib, o‘simlik Janubiy va Markaziy Amerikaning o‘rmonlarida keng tarqalgan. Odatda yerdan uch metr balandroq bo‘lgan gulning nozik barglari uzunligi 28, kengligi 15 santimetrni tashkil etadi. Gul ochilib, changlangandan so‘ng asta-sekin so‘ladi va yoqimsiz hid paydo bo‘ladi.
“U bizning tropik bog‘imizdagi suv kashtaniga yopishtirilgan edi, o‘shandan beri daraxt bo‘ylab o‘sib chiqdi va poyalardan birida kurtak paydo bo‘ldi”, − deydi Sammers.
https://www.instagram.com/p/CLjZSCKpweY/?utm_source=ig_embed
“Tun malikasi” ochilishiga bag‘ishlangan maxsus sahifani 200 mingdan ziyod odam tomosha qilgan, ular orasida Avstraliya, Finlyandiya va Tailand aholisi ham bor. Kaktus kurtaklari mezbon o‘simlikka yopishadi va uning oppoq gullari qorong‘ida gullaydi. “Odamlar buni boshidan oxirigacha tomosha qildi, − deydi mutaxassis. – Umid qilamizki, u yana ko‘p yillar davomida muntazam ravishda gullab, yashnaydi”.
Izoh (0)