Facebook ijtimoiy tarmog‘i siyosiy reklama taqiqlangani sababli koronavirusga qarshi emlashning afzalliklari to‘g‘risidagi pullik postlarni bloklamoqda, deya xabar berdi Politico.
Xabarga ko‘ra, ijtimoiy tarmoq algoritmlari emlash markazlari, shuningdek, vaksinaning ta’sir mexanizmlari to‘g‘risidagi pullik postlarni tarmoqdan olib tashlaydi. Bunday postlar kamida 110 ta guruhda bloklangan — mazkur holat algoritmlarning bu kabi reklamalarni siyosiy deb hisoblashi bilan bog‘liq.
Ta’kidlanishicha, bloklangan xabarlar yuzasidan da’vo ochilishi mumkin, ammo bu jarayon juda mashaqqatli va ko‘p vaqt talab etadi, shuningdek, koronavirus haqidagi ma’lumotlar juda tez o‘zgarishi tufayli bundan naf bo‘lmaydi.
Facebook vakillari muammoni tan oldi va ikkita guruhda reklamalar tiklanganini ma’lum qildi. Kelajakda ijtimoiy tarmoq ma’muriyati bunday xabarlar bloklanishini to‘xtatishga va’da berdi.
Avvalroq Facebook ijtimoiy tarmog‘i avstraliyalik foydalanuvchilar va ommaviy axborot vositalarini tarmoqda mahalliy va xalqaro yangiliklarni ulashish imkoniyatidan mahrum qilgan edi. Bunga qabul qilinishi kutilayotgan qonun sababchi bo‘lgan, unga ko‘ra yangiliklar ulashilgan taqdirda, Facebook, Google va boshqa platformalar o‘z kontentlari uchun OAVga pul to‘lashi kerak.
Shuningdek, Telegram asoschisi Pavel Durov messenjerda huquq-tartibot idoralari xodimlari haqida ma’lumot beruvchi kanallar bloklanganini ma’lum qilgandi. Bunga sabablardan biri sifatida ushbu kanallarda zo‘ravonlikka chaqiriqlar borligini ko‘rsatgan.
Eslatib o‘tamiz, 16-fevral kuni Parler ijtimoiy tarmog‘i faoliyatini qayta tikladi. Tarmoq Tramp tarafdorlari orasida ommalashgani hamda 6-yanvar kungi Vashingtondagi tartibsizliklar tufayli Apple, Google va Amazon kompaniyalari tomonidan bloklangandi. Parler’ning ijrochi direktori Jon Matse 29-yanvar kuni kompaniyadan haydalgan.
Izoh (0)