Qirg‘iziston prezidenti Sadir Japarov mamlakatda rasmiy tillardan biri, shuningdek, millatlararo muloqot tili bo‘lgan rus tilining maqomini o‘zgartirishga qaratilgan har qanday urinishlarga qarshi chiqadi. Bu haqda Japarovning o‘zi “Qirg‘iziston so‘zi” gazetasida chop etilgan “Ittifoqdoshlik aloqalari” maqolasida ma’lum qildi, deb yozadi “RBK”.
“Rus tili — mamlakatda nafaqat rasmiy til, balki millatlararo muloqot tili hamdir. Men prezident hamda inson va fuqaro huquq, erkinliklari kafili sifatida bu masalada har qanday siyosiy manipulyatsiyalarga urinishlarga qat’iyan qarshiman”, — deb yozdi Japarov.
Uning eslatishicha, rus tilining maqomi Qirg‘iziston konstitutsiyasida mustahkamlab qo‘yilgan. Shuningdek, prezidentning ta’kidlashicha, bu til zamonaviy adabiyot, madaniyatni tushunishda cheksiz imkoniyatlarni ochib beradi.
Bundan tashqari, Japarov o‘z maqolasida yozishicha, Rossiya bilan aloqalarni ittifoqdoshlik va strategik sheriklikning eng yuqori darajasiga chiqarish Qirg‘iziston milliy manfaatlariga javob beradi. “Ushbu yo‘nalishga respublika tashqi siyosatida asosiy joy ajratiladi”, — deya qo‘shib qo‘ydi u.
Noyabrda Qirg‘iziston Konstitutsiyaviy kengashi a’zosi Sadirdin To‘raliyev mamlakatda rus tilining rasmiy maqomini bekor qilish taklifi bilan chiqqandi. Bunga Qirg‘iziston yoshlari o‘z ona tilida gaplashmay qo‘yganini sabab qilib ko‘rsatgan. Ammo keyinroq Konstitutsiyaviy kengash rus tili rasmiy til sifatida qoldirilishini ma’lum qildi.
Eslatib o‘tamiz, Sadir Japarov 10-yanvar kuni o‘tkazilgan Qirg‘iziston prezidenti saylovida salkam 80 foiz ovoz olib g‘alaba qozondi. Shundan keyin u Qirg‘izistonda rus tili o‘zining rasmiy til maqomini saqlab qolishiga va’da berdi.
Sadir Japarov Rossiyani ko‘p marotaba mamlakatning asosiy strategik sherigi deb atagan. Saylovlarda g‘olib chiqqanidan keyin ko‘p o‘tmay, u ilk chet el safarini Rossiyaga amalga oshirishini bildirgandi. 15-fevral kuni Japarov Rossiyaga tashrif uchun tayyorgarlik doirasida o‘z-o‘zini yakkalash rejimiga o‘tgani xabar berildi.
Qirg‘iziston Milliy statistika qo‘mitasi ma’lumotlariga ko‘ra, 2020-yilda ruslar respublikada milliy guruh sifatida son bo‘yicha qirg‘izlar va o‘zbeklardan keyingi o‘rinni egallagan. 6,5 million aholining qariyb 345 ming nafarini ruslar tashkil etadi.
Izoh (0)