Bugun,

  • USD 11095.31
  • RUB 173.84
  • EUR 10772.44

Toshkent viloyati hokimi vazifasini bajaruvchi Davron Hidoyatov bir hafta ichida viloyat, shahar va tumanlar hokimliklari elektron hujjat aylanish tizimiga to‘liq o‘tkazilishini ma’lum qildi. Bu haqda “Daryo”ga viloyat hokimligi matbuot xizmati xabar berdi.

Foto: “Daryo”

Foto: “Daryo”

Ma’lum qilinishicha, Davron Hidoyatov 15-fevral, dushanba kuni Toshkent viloyati hokimligida o‘tkazilgan navbatdagi yig‘ilishda viloyatdagi barcha rahbarlarga, mahalliy hokimlik, boshqarma, korxona va tashkilotlarga ikkita yangi topshiriq berdi:

  • bir hafta muddatda Toshkent viloyati hokimligi, shahar va tumanlar hokimliklari elektron hujjat aylanish tizimiga to‘liq o‘tkaziladi. Qog‘ozbozlik maksimal darajada kamaytiriladi;
  • ikki yil ichida viloyatda bog‘cha yoshidagi bolalarning maktabgacha ta’limga qamrab olinishi 100 foizga yetkazilishi bo‘yicha chora-tadbirlar ko‘riladi.
Yig‘ilishda birinchi chorak yakuni bilan investitsiya bo‘yicha belgilangan rejalarning bajarilishi ehtimolligi bo‘lgan hududlar — Bo‘ka, Bo‘stonliq, Piskent, Ohangaron tumanlari va Angren, Ohangaron shaharlaridagi vaziyat tanqidiy tahlil qilindi. Davron Hidoyatov bu tumanlarning hokimlariga vaziyatni o‘nglash bo‘yicha ham aniq topshiriqlar bergan.

Viloyatda 2020-yilda jami 177 ta ijtimoiy soha obyekti uchun 2 trillion 168 million so‘m ajratilgan. Xususan, viloyat hokimligi buyurtmachiligida 69 ta obyekt uchun 607 milliard 118 million so‘m, vazirlik va idoralar buyurtmachiligida 108 ta obyekt uchun 1 trillion 409 million so‘m ajratilgan. Ammo 2020-yilda 62 ta obyektdan 40 tasi foydalanishga topshirilgan, qolgan 22 ta obyekt foydalanishga topshirilmasdan qolmoqda.

Davron Hidoyatov grafikdan ortda qolgan har bir qurilish obyekti bo‘yicha huquq-tartibot idoralarini jalb etgan holda, alohida xulosa tayyorlab, belgilangan tartibda chora ko‘rish bo‘yicha topshiriq bergan.

Bundan tashqari, yoshlarning bo‘sh vaqtini mazmunli o‘tkazish, bunda davlat rahbari ilgari surgan 5 muhim tashabbusni amalga oshirishda sustkashlikka yo‘l qo‘ygan tuman va shaharlarning hokimlariga tanbeh bergan.

2021-yilda yoshlar bilan ishlashning yangicha tizmini joriy etish bo‘yicha tasdiqlangan dasturlar doirasida viloyatda 13 ta madaniyat markazi qurilishi, 9 ta madaniyat markazi rekonstruksiya qilinishi, 7 ta madaniyat va istirohat bog‘i tashkil etilishi, 4 ta teatr faoliyati yo‘lga qo‘yilishi, (shundan, 1 ta qo‘g‘irchoq teatri), 3 ta madaniyat dam olish markazi barpo etilishi, 5 ta madaniy meros obyekti ta’mirlanishi, O‘rta Chirchiq tumanida 1 ta Bolalar musiqa va san’at maktabi tashkil etilishi rejalashtirilgan.

Shuningdek, 2021-yilda viloyatda 17 ta raqamli texnologiyalar o‘quv markazi, 1 ta Robototexnika markazi, 8 ta axborot texnologiyalarini chuqurlashtirib o‘qitishga ixtisoslashtirilgan IT-maktab tashkil etilishi rejalashtirilgan.

Bundan tashqari, Nurafshon shahrida Toshkent davlat axborot texnologiyalari universitetining filiali va texnikumi tashkil etilishi va sentabr oyida ishga tushirilishi belgilangan.

Ammo bugungi kunga qadar universitet filiali va texnikumni barpo etish bo‘yicha loyihalar ishlab chiqilmagan. Bu borada Nurafshon shahar hokimligi tashabbus ko‘rsatishi, loyiha hujjatlarini ishlab chiqish va tez fursatlarda qurilish ishlarini boshlash bo‘yicha amaliy chora-tadbirlar belgilash lozimligi ta’kidlangan.

Zangiota, Qibray, Quyi Chirchiq, O‘rta Chirchiq tumanlaridagi axborot kutubxona markazlarini yuqori tezlikdagi internet tarmog‘iga ulash, elektron kutubxonalar tashkil etish bo‘yicha choralar ko‘rish zarurligi qayd etilgan.

Eslatib o‘tamiz, Davron Hidoyatov Prezidentning 30-yanvardagi farmoni bilan lavozimidan ozod etilgan Toshkent viloyati hokimi Rustam Xolmatovning o‘rniga viloyat hokimi vazifasini bajaruvchi etib tayinlangan edi. Tayinlovga qadar u Toshkent shahar hokimining arxitektura, kapital qurilish va kommunikatsiyalarni rivojlantirish masalalari bo‘yicha birinchi o‘rinbosari lavozimida faoliyat yuritgan.

Izoh
Asosiy yangiliklar
Mahalliy
Rossiya bosh vaziri Mishustin O‘zbekistonga keldi (foto)
Dunyo
“Daryo” kundaligida 1-dekabrda sodir bo‘lgan eng muhim voqealar
Dunyo
Eronda mamlakat terma jamoasining JChdagi mag‘lubiyatini nishonlagan yigit otib o‘ldirildi