Toshkent viloyatida YPX inspektoriga 1 500 000 so‘m pora bermoqchi bo‘lgan haydovchi ushlandi, deya “Daryo”ga xabar bermoqda viloyat IIBB YHXB axborot xizmati.
Qayd etilishicha, 2021-yil 11-fevral kuni Toshkent viloyati Yuqori Chirchiq tumani hududidan o‘tgan 4R6 Toshkent—Chorbog‘ avtomobil yo‘lida xizmat olib borayotgan Toshkent viloyati IIBB YHXB YPXB Maxsus otryadi katta inspektori, leytenant M.Turopov, taxminan, soat 11:20 larda Bo‘stonliq tumani yo‘nalishidan harakatlanib kelayotgan Qashqadaryo viloyati ro‘yxatida turuvchi 1992-yilda tug‘ilgan fuqaro R.A. boshqaruvida bo‘lgan Nexia-3’ni xavfsizlik kamari taqmagani uchun to‘xtatgan.
Inspektor haydovchining og‘zidan spirtli ichimlik hidi anqib turganligini gumon qilib, uni ikki xolis oldida tibbiy ko‘rikdan o‘tishga taklif qilgan. Natijada haydovchi R.A. spirtli ichimlik ichganligini tan olib, ikki xolis oldida tibbiy ko‘rikdan o‘tishdan bosh tortgan.
YPX inspektori ushbu holat yuzasidan Ma’muriy javobgarlik to‘g‘risidagi kodeksning 136-moddasiga ko‘ra (haydovchilarning va yo‘l harakati boshqa ishtirokchilarining mastligi yoki mast emasligini aniqlash uchun tekshiruvdan o‘tishdan bo‘yin tovlashi) ma’muriy bayonnoma rasmiylashtirib, avtomashinani jarima maydoniga joylashtirgan.
Shundan so‘ng Nexia-3 haydovchisi R.A. o‘ziga nisbatan rasmiylashtirilgan ma’muriy bayonnomani bekor qilib, avtomashinani jarima maydonidan chiqarib berish evaziga YPX xodimiga 1 500 000 som pulni pora tariqasida taklif qilgan.
Holat yuzasidan YPX xodimi bildirgi orqali viloyat IIBB boshlig‘iga murojaat qilib, qonunda belgilangan tartibda chora ko‘rilishini so‘ragan.
YPX xodimining bildirgisi asosida xavfsizlik xizmati xodimlari tomonidan o‘tkazilgan tezkor tadbir davomida 2021-yilning 11-fevral kuni Yuqori Chirchiq tumani, Bolta qishlog‘ida joylashgan jarima maydonchasida soat 18:20 larda fuqaro R.A. YPX xodimiga 1 500 000 so‘m miqdoridagi pullarni pora tariqasida bergan vaqtda ashyoviy dalillar bilan ushlangan.
Mazkur holat yuzasidan Yuqori Chirchiq tumani prokuraturasi tomonidan tergov harakatlari olib borilmoqda.
Bundan avval Gulistonda jarima maydonchasidan mashinasini chiqarib berishini so‘rab, YHXB xodimiga pora taklif qilgan haydovchi qo‘lga olingani, Andijonda musiqa maktabi direktori 500 dollar pora bilan ushlangani hamda Farg‘onada 8 gektar yer olishda yordam berish evaziga 8 ming dollar olgan sobiq kadastr xodimi ushlangani haqida xabar berilgan edi.
Izoh (0)