Mercedes-Benz фирмаси 50 миллионинчи автомобилини ишлаб чиқарганини нишонлади. Ҳайратланарли рақамларга немис маркасининг 95 йиллиги арафасида эришишга муваффақ бўлинган. Тартиб рақами 50 000 000 бўлган икки хил рангли Mercedes-Maybach S 580 лимузини Зиндельфингендаги завод конвейеридан чиққан, деб хабар беради Motor.
Mercedes-Benz ишлаб чиқарилаётган автомобиллари ҳисобини 1946 йилдан буён юритиб келмоқда, яъни 50 миллионинчи автомобиль маррасига компания 75 йилда эришган. Mercedes-Benz бошқарув кенгаши аъзоси Йорг Бурзер ушбу юбилейни «мутлақо жамоанинг ютуғи» ва «компания тарихидаги муҳим давр»лигини таъкидлаган.
50 миллионинчи автомобиль — бензинда ҳаракатланадиган Mercedes-Maybach ҳашаматли лимузини эканлиги эътиборга молик, ушбу Factory 56 фабрикасида жорий йилдан Mercedes-Benz EQS электрокарини ишлаб чиқариш ҳам бошланади. Немис фирмаси 2022 йилга қадар «батареяли» Mercedes-Benz EQ линейкасини олтита моделга қадар оширишни режалаштирган. Айни вақтда учта электрокар номи маълум — EQA ва EQS кроссоверлари, шунингдек, EQV минивени.
Эслатиб ўтамиз, 2020 йилнинг декабрида Mercedes-Benz G-Class’нинг 400 мингинчи нусхаси ишлаб чиқарилгани эълон қилинганди.
Изоҳ (0)